«كەسار تىلىگىن جاساعاندا بالانىڭ باسىن قوسا ءتىلىپ جىبەرگەن» — الماتىلىق كەلىنشەك ۇلىنىڭ دەرتىنە دارىگەرلەردى كىنالايدى

انار مەيرەنبەكوۆا بىلتىر 24 قازاندا الماتىداعى №5 پەرزەنتحانادا كەسار تىلىگىمەن بوسانعان. ايەلدىڭ ايتۋىنشا, جۇكتىلىك وتە جاقسى وتكەن, ءبارى كۇتپەگەن جەردەن پەرزەنتحاناعا بارعاندا وزگەرگەن. ونىڭ ايتۋىنشا, وپەراتسياعا بىرنەشە ستۋدەنت پاتسيەنتتىڭ رۇقساتىنسىز كىرگەن جانە وتانى جاساعان ادام شاقالاقتىڭ باسىن قوسا ءتىلىپ جىبەرگەن, دەپ جازادى Qandastar.kz.

Stan.kz اقپارات اگەنتتىگى بالاسى ءۇشىن شارق ۇرىپ جۇرگەن انامەن سويلەسىپ, انىق-قانىعىن ءبىلدى. 

بۇل وقيعا اناردىڭ ءومىرىن 180 گرادۋسقا وزگەرتىپ جىبەردى. پەرزەنتحاناعا بارعاندا وعان كەسار تىلىگىن جاساماسا بولمايدى, بالاڭ شەتىنەيدى دەگەن.

«جۇكتىلىگىم وتە جەڭىل وتكەنىمەن اۋىر بوساندىم. ءبىز كۇتپەگەن جاعداي بولدى. مەن جۇكتى كەزىمدە ەكى جۇمىس ىستەپ, ماگيستراتۋرانى وقىپ, سونىمەن قاتار, IELTS-قا دايىندالىپ, ۇلگەرىپ ءجۇردىم. ءبىر اي كەيىن بوسانۋىم كەرەك ەدى, بىراق ءبىر اي ەرتە بولدى. 34-اپتادا كارديوتوكوگرافيا (كتگ) جاسادى, سول كەزدە بالانىڭ جۇرەگى جاقسى سوعىپ تۇردى. ال 36-اپتادا 4 رەت كتگ تۇسىرگەندە جۇرەگى ءالسىز سوعىپ تۇر دەدى. سودان «شۇعىل تۇردە كەسار تىلىگىن جاساماسا بولمايدى, بالاڭ ولەدى, جاتىرىڭ زارداپ شەگەدى» دەپ جەتكىزدى», – دەيدى انار.

پەرزەنتحاناداعى دارىگەرلەر پاتسيەنتتى وپەراتسياعا شۇعىل الىپ كەتكەن. اناردىڭ سوزىنشە, دارىگەرلەر پاتسيەنتتىڭ اياعىنا وپەراتسياعا ارنالعان ش ۇلىقتى كيگىزبەگەن, دورەكى سويلەگەن, وپەراتسياعا ستۋدەنتتەر كىرەتىنى جانە وتا اعىلشىن تىلىندە وتەتىنى ەسكەرتىلمەگەن, بالاسىنىڭ باسى كەسىلىپ كەتكەن جانە سول تۋرالى ايتىلماعان. سونىمەن قاتار, بالاسىنىڭ باسى كەسىلىپ كەتكەنى نەگە ايتىلمادى, بالاعا كومەك كەرەك بولسا, بىردەن حيرۋرگياعا نەگە الىپ كەتپەدى دەيدى شىرىلداعان انا.

«وپەراتسياعا كىرگىزەردە مەدبيكەگە اياعىما وپەراتسياعا ارنالعان ش ۇلىق الىپ كەلدىم, كيگىزىڭىزشى دەپ سۇرادىم. ول قازىر ۋاقىت جوق دەپ دورەكى سويلەپ, كيگىزبەدى. ال وپەراتسيا اعىلشىن تىلىندە ءوتتى, دارىگەردىڭ قاسىندا 7-8 ءۇندىس پراكتيكانت ستۋدەنت تۇردى. ال ولاردى كىرسىن دەپ مەنەن ەشكىم رۇقسات سۇراعان جوق, ءتىپتى ەسكەرتىپ ايتقان دا جوق. 5 روددومدا جانار احاتاەۆا دەگەن كىسى كەسار تىلىگىن جاسادى. وپەراتسيادان سوڭ بالامدى ينتەنسيۆتى تەراپيا جانە زەرتتەۋ بولىمىنە الىپ كەتتى. مەنەن «سىزدە گەنەتيكا جاعىنان قولىڭىزدا بىرنارسە بولعان با ەدى?» دەپ سۇرادى. بالانىڭ وڭ قولىندا فلەگمونا بار دەيدى, قاراسام قىزارىپ تۇردى. قۇددى بالامدى قايناعان سۋمەن كۇيدىرگەندەي بولىپ تۇردى. ال ول كەزدە مەن بالانىڭ جەلكە تۇسىندا كەسىلگەن جەر بار ەكەنىن بىلمەدىم. دارىگەرلەردەن سۇراسام, «بالاڭىز وسىلاي دۇنيەگە كەلدى» دەدى, كەيىن «اپپاراتتا جاتقاندا ءىزى قالىپ قالعان» دەدى. بىراق ءىز دەگەن جارتى جىل تۇرمايدى عوي», – دەدى انار مەيرەنبەكوۆا.

تۋعان سوڭ بالا بىرنەشە كۇندە ينسۋلت العان. ومىرگە جاڭا كەلگەن نارەستە 1,5 اي بويى اپپاراتتا جاتىپتى. انار 2 ايدان سوڭ عانا بالاسىن قولىنا العاندا بالالار نەۆروپوتولوگىنا بارعان, ول بالانىڭ باسى دۇرىس ەمەس, تەكسەرتىڭىزدەر دەگەن. ودان سوڭ بالالار نەيروحيرۋرگىنا كىرگەن. سونىمەن قاتار ول بالاسى جارىققا رەاكتسيا تانىتپايتىنىن بايقاعان. سول كەزدە تولىق تەكسەرىلگەن سوڭ عانا وعان ميكروتسەفاليا, باس ميىنىڭ نىساناسى, ينسۋلت, دەپلەگيا, دتسپ, كوز تامىرىنىڭ وترافياسى دياگنوزدارى قويىلدى. وسىلايشا انا بالاسىنىڭ دياگنوزىن جەكە ەمحاناعا بارىپ, ءبىر-اق بىلگەن.

قازىر انار مەيرەنبەكوۆا مۇگەدەك بالانىڭ رەابيليتاتسياسىمەن ءجۇر, بالاسىن ءبىر جاسقا دەيىن ەمدەۋ ءۇشىن شارق ۇرىپ قارجى جيناپ جاتىر. قىتايلىق دارىگەرلەر ەمدەۋگە كەلىسكەن, تولىقتاي ايىقتىرماسا دا, بۇل ەم اۋرۋدىڭ سالدارىن اجەپتاۋىر ازايتادى ەكەن. قازىر وسپاننىڭ ەمىنە 50 ميلليون تەڭگە كەرەك.