Kıberqylmystyń 99%-y ınternet alaıaqtyqpen baılanysty

Bıyl 3645 ınternet-alaıaqtyq deregi tirkeldi.

Spıkerdiń sózinshe, kıberqylmystarǵa aqparatqa zańsyz qol jetkizý, ony joıý, ózgertý, buǵattaý; zııandy baǵdarlamalardy qurý jáne paıdalaný; Internet jelisinde pornografııany taratý; avtorlyq quqyqty buzý jáne elektrondyq jymqyrý, aqparattyq tehnologııalardy paıdalana otyryp jasalatyn basqa da qylmystar jatady.

«Barlyq kıberqylmystyń 99%-y – ınternet alaıaqtyq. Qazir atalǵan qylmys túrimen barlyq el, sonyń ishinde aqparattyq tehnologııalar salasynda damyǵan memleketter de zardap shegip otyr. Sońǵy 7 jylda Qazaqstanda olardyń sany 10-nan astam esege ósti. Mundaı qylmystar ótken jyly tirkelgen qylmystardyń jalpy sanynyń 19%-yn jáne barlyq alaıaqtyq dereginiń 50%-yn quraıdy. Byltyr azamattarǵa 21 mlrd teńgege zalal keldi», — dedi IIM ókili Májiliste ótken komıtet otyrysynda.

Bıyl 3645 ınternet-alaıaqtyq deregi tirkeldi. Bul jalpy qylmystyń 18%-yn jáne barlyq alaıaqtyq dereginiń 43%-yn quraıdy.

«4 myń ınternet-alaıaqtyqqa qatysy bar 2 myńǵa jýyq adam ustalyp, jaýapqa tartyldy. Jábirlenýshilerge 850 mln teńge kóleminde zalal óteldi», — dedi vıe-mınıstr.

Aıdos Rysbaevtyń dereginshe, negizinen mundaı qylmystar shetelden nemese sheteldik ınternet-resýrstardy paıdalaný arqyly jasalady.

«Anonımdiligin qamtamasyz etý úshin hakerler óz qurbandary retinde shetel azamattaryn tańdaıdy. Mysaly, 2023 jyldyń sońynda Astanada 4 alaıaqtyq call-ortalyq anyqtaldy. Olardyń qyzmetkerleri tek sheteldik nómirlerge qońyraý shalǵan. Qazaqstandyqtarǵa qatysty osyndaı qylmystar da shetelden jasalady», — dep atap ótti ol.