قوناەۆتا وقۋشىنى ءولىمشى ەتىپ ساباعان – اكىمدىك مالىمدەمە جاسادى

گۇلميرا ابىقايدىڭ جازۋىنشا, قازىر بالا جانساقتاۋ بولىمىندە.

«قالاعا كىرە بەرىس الىپ كوپىردىڭ استى كۇشى تاسىعان وقۋشىلارعا كۇشتى مەكەن بولدى. توپتىق توبەلەس, تىعىلىپ ءىشۋ, تارتۋ ءبارى وسىندا وتەدى.كەشە عانا 9 سىنىپ وقۋشىلارى توپتاسىپ ءوز سىنىپتاسىن ءولىمشى ەتىپ ۇرىپ تاستاعان.بالا جانساقتاۋ بولىمىنە ءتۇستى, قازىر اۋرۋحانادا».گۇلميرا ابىقاي

بۇل رەتتە, قالا اكىمدىگىنىڭ ءباسپاسوز قىزمەتى اقپاراتتىڭ جالعان ەكەندىگىن مالىمدەدى. سونداي-اق, قوناەۆتا بۇعان دەيىن كوپىردىڭ استىندا توبەلەس بولعانى تۋرالى دەرەك تىركەلمەگەنىن باسا ايتتى.

ءوز كەزەگىندە وقۋشىنىڭ اناسى توبەلەس بولعانىن جوققا شىعارىپ, بەينەجازبا تۇسىرگەن.

«وسى جىلدىڭ 31 قاڭتارىندا كامەلەتكە تولماعان ۇلىم جەرگىلىكتى اۋرۋحاناعا ءتۇستى. قالانىڭ كىرەبەرىس كوپىرىنىڭ استىندا ۇلىمدى ەشكىم سوققىعا جىققان جوق جانە ەشقانداي توپتىق توبەلەس بولعان جوق», – دەدى ول.

Zakon.kz حابارلاعانداي,  وقۋشىنىڭ اۋرۋحاناعا ءتۇسۋ سەبەبى «ونى قاتارلاستارى ءولىمشى ەتىپ ساباعاننان» ەمەس, ء«وز-وزىنە قول جۇمساماق بولعانىنان» ەكەندىگى بەلگىلى بولدى.

«بۇعان دەيىن پوليتسيا باسقارماسى ءمالىم ەتكەندەي, ءوزىن-ءوزى ولتىرۋگە دەيىن جەتكىزۋ دەرەگى بويىنشا قىلمىستىق ءىس قوزعالدى. قازىرگى ۋاقىتتا بولعان وقيعانىڭ بارلىق ءمان-جايلارىن تولىق جانە جان-جاقتى زەرتتەۋ ءۇشىن بارلىق قاجەتتى تەرگەۋ ارەكەتتەرى جۇرگىزىلۋدە. اتالعان جۇمىستاردىڭ ناتيجەسى بويىنشا تۇپكىلىكتى پروتسەستىك شەشىم قابىلداناتىن بولادى. وزگە اقپارات تەرگەۋ مۇددەسىنە وراي جاريا ەتىلمەيدى».قوناەۆ قالاسى اكىمىنىڭ ءباسپاسوز قىزمەتى

اكىمدىك اقپاراتىنا سۇيەنسەك, بۇگىندە جەرگىلىكتى ءبىلىم ءبولىمى ورتا مەكتەپ-گيمنازياسىنداعى تارتىپتىك جاعدايعا قاتىستى كوميسسيا قۇردى. وقۋشى «انتيسەپتيكپەن ۋلانۋ» دياگنوزىمەن اۋرۋحاناعا تۇسكەن. قازىرگى تاڭدا جاعدايى جاقسى, ەم قابىلداۋدا. وزىنە-ءوزى قول جۇمساماق بولعان بالا وقۋدا وزات, ورتاسىندا سىيلى وقۋشى.

سونىمەن قاتار, اكىمدىك باق وكىلدەرى مەن قازاقستان حالقىن رەسمي اقپارات كوزدەرىنە عانا سەنۋگە شاقىردى.

«جالعان اقپارات تاراتۋ ءۇشىن قر زاڭناماسى اياسىندا اكىمشىلىك جازا قاراستىرىلعانىن ەستەرىڭىزگە سالامىز».قوناەۆ قالاسى اكىمىنىڭ ءباسپاسوز قىزمەتى