قىتايلىقتار ونلاين ساۋدا نارىعىندا ءبىرىنشى ورىندا تۇر

2027 جىلعا قاراي الەم بويىنشا ەلەكتروندى ساۋدا كولەمى 9,3 تريلليون دوللارعا ارتادى. بۇل – بريتانيالىق ساراپتامالىق كونسالتينگتىك GlobalData كومپانياسىنىڭ دەرەگى. ينتەرنەت دۇكەندەردىڭ ادامعا تيگىزەر پايداسى زور. بىراق قورشاعان ورتاعا كەلتىرەر زياندى تۇستارى دا جەتەرلىك. دۇنيەجۇزىلىك ەكونوميكالىق فورۋمنىڭ دەرەگى بويىنشا جىل سايىن ەلەكتروندى ساۋدا كەزىندە 165 ميلليارد قاپتاما قوقىسقا تاستالادى ەكەن. ءيا, ونلاين ساۋداسى قىزعان زاماننىڭ قىزىعىن ساتۋشى دا, تۇتىنۋشى دا كورىپ وتىر. ايشىلىق الىس جەرلەردەن جىلدام تاۋار الدىرۋ ءۇشىن قازىر ايلاپ, اپتالاپ ەمەس, ءارى كەتسە 3 كۇن كۇتەرسىز. ادام ءۇشىن تاپسىرىستىڭ قاشان جەتەتىنى ماڭىزدى. بىراق ول قالاي كەلەدى? ونلاين ساۋدانىڭ پايداسىنان زيانى كوپ تۇتىنۋشى ءۇشىن تاپسىرىسىنىڭ ب ۇلىنبەي, سىنباي كەلگەنى ماڭىزدى. سوندىقتان ساۋداگەر كومپانيالار تاۋار قاپتاماسىنا ۇلكەن ءمان بەرەدى. ءسويتىپ, قاعاز, پوليەتيلەن قاپشىقتارمەن قاپتاپ تاستايدى. ماسەلەن, جىل سايىن الەمدە 241 ميلليون توننا قوراپ وندىرىلەدى. ول ءۇشىن Canopy ورمانداردى قورعاۋ ۇيىمىنىڭ دەرەگىنە سۇيەنسەك, 3 ميلليارد اعاش كەسىلەدى. ماسەلەن, 2020 جىلى قىتايدا 80 ميلليارد تاۋاردى جەتكىزۋ ءۇشىن, 10 ميلليون توننا قوراپ قاپتاما قولدانعان. ۆيولا ۆولگەمۋت, ەكو-بەلسەندى: — اسىرەسە جومارت جۇما كەزىندە ينتەرنەت-دۇكەندەردە جەڭىلدىكتەر كوپ بولادى. كەي تۇتىنۋشىلار جىلدام جەتكىزۋدى تاڭدايدى دا, زاتىنىڭ قانداي ترانسپورتپەن جەتەتىنىنە باس اۋىرپايدى. ماسەلەن, ءبىر ءتۇيىر زات, ۇلكەن جۇك كولىگىنىڭ ىشىندە بولار-بولماس ورىن الىپ كەلۋى مۇمكىن. ول كولىك ارى-بەرى جۇرگەن سايىن اۋاعا ۋلى زات بولەدى. بازارعا باراتىن حالىق قاراسى ازايدى. ەسەسىنە جۇك تاسيتىن كولىك سانى ارتتى. ۇشاق, پويىز, جۇك كولىكتەرى جانە اۆتوموبيلدەر – قويمادان تۇتىنۋشىعا جەتەتىن ترانسپورت تىزبەگى وسىنداي. الەمدىك ستارتاپ جوبا Earth 5R دەرەگى بويىنشا 2020 جىلى ينتەرنەت ارقىلى قابىلدانعان تاپسىرىستاردى جىبەرۋ كەزىندە, كولىكتەردەن اۋاعا تاراعان كومىرقىشقىل گازىنىڭ كولەمى 37%-كە جەتكەن. ساراپشىلار: «2030 جىلعا قاراي جەتكىزۋشى كولىك سانى 7 ميلليونعا جەتەدى», — دەيدى. جۇك كولىكتەرى اۋانى لاستايدى الەمدەگى ەڭ ءىرى ونلاين ساۋدا الاڭى – ول امەريكالىق امازون سايتى. كۇنىنە 4 ميلليون تاۋار جەتكىزىلىپ, گادجەتتەر, كيىم-كەشەكتەر, تۇرمىستىق زاتتاردىڭ ميلليونداعان مودەلى ۇسىنىلادى. وسى ارقىلى اقش جاھاندىق نارىقتى جاۋلاعىسى كەلەدى. ال وعان ەۋروپالىقتار بەيجاي قاراسىن با?! ماسەلەن, فرانتسيانىڭ كەي ورتالىقتارىندا كومپانيانىڭ قويمالارى سالىنعان. ودان شىعىپ, قالا ىشىندە ارى-بەرى زۋلاعان جۇك كولىكتەرىنىڭ ءجۇرىسى جەرگىلىكتى حالىقتىڭ تيتىعىنا تيگەن ەدى. جيل رەنەۆە, ەكو-بەلسەندى: — ءبىر عانا كومپانيا ەكولوگياعا مول شىعىن كەلتىرىپ وتىر. بۇل جالعاسا بەرسە, جاعداي ودان بەتەر ۋشىعادى. ماسەلەنى زاڭ جۇزىندە شەشۋ كەرەك دەپ ويلايمىن. «قىتايدا جاسالعان» تاۋارلاردى الەمدە قازىر ءاربىر 3-ءشى تۇرعىن تۇتىنادى. ناعىز ساۋداگەر قىتايلىقتار ونلاين ساۋدا نارىعىندا ءبىرىنشى ورىندا. جاھاندىق ەلەكتروندى كوممەرتسيا نارىعىنىڭ 52,1%-ءى وسى قىتايلىقتاردىڭ ۇلەسىندە. ودان كەيىن اقش-تىڭ ينتەرنەت ساتىلىم كولەمى 20%-ءتى كورسەتسە, رەيتينگتەگى ءۇشىنشى ورىن 3,4% كورسەتكىشىمەن ۇلىبريتانياعا تيەسىلى. ونلاين-ساۋدانىڭ ءبىر ءتيىمسىز تۇسى, تاۋاردى ولشەپ, ءپىشىپ كورمەگەسىن ونى قايتارۋعا تۋرا كەلەدى. ياعني, ونى ورايتىن قاپتامانىڭ شىعىنى ەكە ەسە ارتادى دەگەن ءسوز. ودان قالدى, ساتۋشى مەن تۇتىنۋشى اراسىندا ساندالىپ جۇرەتىن ترانسپورتتىڭ شىعىنى بار. سوندىقتان تاپسىرىس بەرگەن كەزدە قارا باستىڭ قامىن ەمەس, قورشاعىن ورتانىڭ جاعدايىن دا ويلاعان ءجون. تاپسىرىس بەرگەن كەزدە ونىڭ ولشەمىنە, ساپاسىنا مۇقيات بولۋ كەرەك. سوندا تاپسىرىس وزىڭىزدە قالادى دا ارتىق شىعىن بولمايدى.