ماڭعىستاۋلىق ستۋدەنتتەر بيزنەس فورۋمعا قاتىستى

ماڭعىستاۋدا م. تىنىشپاەۆ اتىنداعى قازاتك كوللەدجىنىڭ بەس ستۋدەنتى الماتى قالاسىنداعى «Enactus Kazakhstan Business Collaboration Forum» قاتىسىپ كەلدى. ولاردىڭ جول ءجۇرۋ شىعىنىن «جەتى جۇرت» قوعامدىق بىرلەستىگى «جول ءجۇرۋ گرانتى» جوباسى اياسىندا وتەپ بەردى.

فورۋمعا ەلدىڭ تۇكپىر-تۇكپىرىنەن 1 118 ستۋدەنت قاتىسقان. نەگىزگى ماقسات – بەلسەندى ستۋدەنتتەر, بيزنەس ساراپشىلاردىڭ باسىن بىرىكتىرىپ, ءتۇرلى جوبالاردى تالقىلاۋ, ۇزدىك جوبالاردى انىقتاۋ ارقىلى جاستاردىڭ بيزنەس باستاۋىناق قولداۋ كورسەتۋ.

فورۋمنىڭ اشىلۋىندا Enactus Kazakhstan ديرەكتورلار كەڭەسىنىڭ توراعاسى, «اتامەكەن» قر ۇلتتىق كاسىپكەرلەر پالاتاسىنىڭ توراعاسى رايىمبەك باتالوۆ ءسوز سويلەدى.

«مۇنداي جوبا وسىندا وتىرعان ءاربىر ادام ءۇشىن ماڭىزدى. جاستار, ورتاق ماقسات ءۇشىن بىرىگىپ, ەلىمىزدىڭ ءبىلىم مەن عىلىم سالاسىنا ءوز ۇلەستەرىڭدى قوسىپ جاتسىڭدار. بۇگىنگى بيزنەس فورۋم جاستارعا قولداۋ كورسەتۋ ءۇشىن ۇيىمداستىرىلدى. مەن مۇنداعى ءار ستۋدەنت بولاشاقتا ەل ماقتانىشىنا اينالاتىن جوبالاردى ىسكە اسىراتىنىنا سەنىمدىمىن», — دەدى رايىمبەك باتالوۆ.

ماڭعىستاۋلىق جاستار ءتۇرلى باعىتتاعى ءتورت جوبانى ۇسىنعان. ايتۋىنشا, جوبا ۇزدىك اتانسا, 3 ملن تەڭگەدەي قارجىلاي قولداۋ كورسەتىلەدى. جوبا جەڭىمپازدارى 2024 جىلدىڭ اقپان ايىندا انىقتالادى.

سونىمەن قاتار فورۋم اياسىندا قاتىسۋشىلار سەمينار-ترەنينگتەرگە قاتىسىپ, ءبىلىم الىپ, تاجىريبە الماستى.