مەن ساياساتكەر دە, شەنەۋنىك تە ەمەسپىن, ءوزىمدى ناقتى ىسپەن دالەلدەيمىن — گولوۆكين

«جاڭا لاۋازىمدا ەلىمىزدىڭ اتىنان ارەكەت ەتۋ — مەن ءۇشىن زور مارتەبە. ماعان قازاقستان ۇلتتىق وليمپيادالىق كوميتەتىن باسقارۋدى ۇسىنعاندا, قازاقستاندىق سپورتتى دامىتۋعا ءوز ۇلەسىمدى قوسۋعا مۇمكىندىك بەرسە عانا, كانديداتۋرامدى ۇسىناتىنىمدى ايتتىم.

وزدەرىڭىز بىلەتىندەي, مەن ساياساتكەر دە, شەنەۋنىك تە ەمەسپىن. ءوز ويىمدى, جوسپارىمدى سوزبەن ەمەس, ىسپەن دالەلدەپ ۇيرەنگەنمىن.

وسى ورايدا, مەنىڭ ءوز كوزقاراسىم, جىلدار بويى جينالعان حالىقارالىق تاجىريبەم بارىن, كوماندا بارىن ايتقىم كەلەدى. ال ەڭ باستىسى جانە مەنىڭ كوپتەن بەرگى قالاۋىم – بۇل بارلىعىن دا ءوزىمنىڭ تۋعان ەلىمدە جۇزەگە اسىرۋ», — دەدى قازاقستان ۇوك جاڭا باسشىسى باس اسسامبلەياسىنىڭ كەزەكتەن تىس وتىرىسى اياسىندا.