“مەنى ءولتىرىپ جاتىر”: اقتوبەدە كومەك سۇراعان ايەلدىڭ قوڭىراۋىن جاۋاپسىز قالدىرعان 112 قىزمەتكەرى سوتتالدى

فوتو: depositphotos.com

اقتوبەدە ءوزىن ءولتىرىپ جاتقانىن ايتىپ كومەك سۇراعان سوققان ايەلدىڭ قوڭىراۋىن جاۋاپسىز قالدىرعان 112 قىزمەتكەرى سوتتالدى. بۇل تۋرالى Stan.kz اقپارات اگەنتتىگى حابارلايدى.

اقتوبە قالالىق سوتىندا “سالعىرتتىق” بابىمەن ايىپتالعان 112 قىزمەتكەرىنە قاتىستى ءىس قارالدى. قىزمەتكەر “مەنى ءولتىرىپ جاتىر” دەگەن قوڭىراۋدى قابىلداعانىمەن ەشقانداي ارەكەت ەتپەگەن. ءتيىستى ورىندارعا حابارلاماعان.

سوت جابىرلەنۋشى وكىلىنىڭ سوتتالۋشىدان 300 مىڭ تەڭگە كولەمىندەگى ماتەريالدىق جانە 5 ملن تەڭگە كولەمىندەگى مورالدىق شىعىنداردى ءوندىرۋ تۋرالى تالابىن قاناعاتاندىرمادى.

ء“ادىل قاليدوللا قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىلسىن. وعان مەملەكەتتىك قىزمەتتە جانە قۇقىق قورعاۋ ورگاندارىندا لاۋازىمداردى اتقارۋ قۇقىعىنان 3 جىلعا ايىرا وتىرىپ, 2 جىل مەرزىمگە باس بوستاندىعىنان ايىرۋ جازاسى تاعايىندالسىن. جابىرلەنۋشىنىڭ ماتەريالدىق, مورالدىق زياندى ءوندىرۋ تۋرالى ازاماتتىق تالاپ ارىزى قاراۋسىز قالدىرىلسىن”, – دەلىنگەن سوت ۇكىمىندە.

سونىمەن قاتار سوت اقتوبە وبلىسىنىڭ توتەنشە جاعدايلار دەپارتامەنتىنىڭ باسشىسىنا دا جەكە قاۋلى شىعاردى. تج قىزمەتكەرىنىڭ سالعىرتتىعىنا بايلانىستى زاڭبۇزۋشىلىققا نازار اۋدارۋدى, ولاردىڭ الدىن الۋ ماقساتىندا جۇمىستاردى كۇشەيتۋدى تاپسىردى.

سوت بارىسىندا فيلولوگيالىق ساراپتاماعا ەرەكشە نازار اۋدارىلدى. سوتتىڭ مالىمەتىنشە, جابىرلەنۋشىدەن كەلىپ تۇسكەن حابارلامادا راسىندا دا ءولتىرىپ جاتقانى جانە دەنساۋلىعىنا قاۋىپ ءتونىپ تۇرعانى سوزدەردىڭ ماعىناسىمەن دالەلدەنگەن.

ءىس ماتەريالدارىنا سۇيەنسەك, وقيعا 2024 جىلى 9 ماۋسىم كۇنى ساعات 12:18 ۋاقىتىندا تىركەلدى.

اقتوبە وبلىسىنىڭ توتەنشە جاعدايلار دەپارتامەنتىنىڭ داعدارىس جاعدايلارى باسقارماسىنىڭ جەدەل كەزەكشىسىنىڭ كومەكشىسى قوڭىراۋدى قابىلداعان. بىراق قوڭىراۋدى ەلەمەي, ىشكى ىستەر ورگاندارىنىڭ جاساقتارىن قىلمىس ورنىنا جۇمىلدىرۋعا باعىتتالعان شۇعىل ارەكەتتەر جاساماعانى ايتىلادى.

ەسكە سالساق, بۇعان دەيىن اقتوبەدە ءولىم الدىندا كومەك سۇراپ, قوڭىراۋ شالعان ايەلگە ديسپەتچەر ءمان بەرمەگەنى تۋرالى جازعان ەدىك.