«ميسس قازاقستان» بايقاۋىنا ترانسگەندەرلەر دە قاتىساتىن بولدى

18 ماۋسىمدا وتكەن ءباسپاسوز ءماسليحاتىندا Miss Qazaqstan قوعامدىق قورىنىڭ ديرەكتورى ايجان رۋزاەۆا «ميسس قازاقستان» بايقاۋىنا ترانسگەندەر ادامدار مەن دەنە ءبىتىمى ەرەكشەلەۋ ارۋلار دا قاتىسا الاتىنىن مالىمدەدى. بۇل تۋرالى qandastar.kz اقپارات پورتالى Stan.kz-كە سىلتەمە جاساپ حابارلايدى.

بايقاۋدىڭ فينالى بيىل كۇزدە الماتى مەتروسىندا وتەدى.

«Plus-size ارۋلار قاتىسا المايدى دەگەندى كىم ايتتى? ءبىز مۇنداي قاتىسۋشىلاردى قۋانا قارسى الامىز. ءبىز ءبارىن كۇتەمىز. مەيلى ول ترانسگەندەر بولسىن, مەيلى plus-size بولسىن – بۇل ەركىن تاڭداۋ. ەگەر ادام ءوزىن سولاي سەزىنسە, قاتىسا الادى. ءبىز بارىنە اشىقپىز. ەگەر plus-size قىز كەلىپ, ادەمى, حاريزماتيكالىق, جارقىن بولسا, ونى دا قاراستىرامىز. 90-60-90 ولشەمدەرى باياعىدا-اق ۇمىت بولعان, – دەدى ايجان رۋزاەۆا.

ءداستۇرلى تۇردە بايقاۋ فينالىنا ەلىمىزدىڭ 15 وڭىرىنەن كەلگەن ارۋلار قاتىسادى.

فينال 30 قاراشا كۇنى تۇنگى 23:00-دە الماتى مەتروسىنداعى «مۇحتار اۋەزوۆ تەاترى» ستانتسياسىندا وتەدى. مۇنداي كەش ۋاقىتتى ۇيىمداستىرۋشىلار جولاۋشىلار قوزعالىسىنا كەدەرگى كەلتىرمەس ءۇشىن تاڭداعان. بايقاۋ جابىق فورماتتا وتەدى, بيلەت ساتىلمايدى. فينالدى تەك ارنايى جىبەرىلگەن اتى-ءجونى جازىلعان شاقىرتۋلارمەن عانا كورۋگە بولادى. ءىس-شارانى شامامەن 90 ادام تاماشالاي الادى, ولاردىڭ قاتارىندا بلوگەرلەر مەن جۋرناليستەر بار. قالعان كورەرمەندەر بايقاۋدى رەسمي ونلاين ترانسلياتسيالار ارقىلى كورە الادى.