“مىلتىقپەن ەكى رەت اتقان”. ايەلىن سىنىپتاسىنان قىزعانىپ, اتىپ ولتىرگەن كۇيەۋى جايلى سۇمدىق دەرەك شىقتى

فوتو: اشىق دەرەككوز

قىرعىزستاننىڭ وش وبلىسىندا مەكتەپتى اياقتاعانىنا 20 جىل تولۋىن اتاپ وتكەننەن كەيىن ەر ادام ايەلىن اتىپ ولتىرگەن دەپ حابارلايدى Qandastar.kz سايتى تۋرالى ازاتتىق راديوسىنا سىلتەمە جاساپ.

الدىن الا مالىمەت بويىنشا, قىلمىسقا قىزعانىش سەبەپ بولعان. كۇدىكتى ەر ادام قاماۋعا الىندى. بەس كامەلەتكە تولماعان بالا جەتىم قالدى.

قايتىس بولعان ايەل — بەس بالانىڭ اناسى بولعان. ول وتباسىمەن بىرگە قارا-قۇلجا اۋدانىنا قاراستى ساي اۋىلىندا تۇرعان. 26 مامىر كۇنى كۇيەۋىمەن بىرگە مەكتەپ بىتىرگەندەرىنە 20 جىل تولۋىن اتاپ ءوتۋ ءۇشىن ۇزگەن اۋدانىنىڭ العا اۋىلىنا بارعان. مەكتەپتەگى مەرەكەدەن كەيىن ەرلى-زايىپتى ۇيلەرىنە ورالىپ, ارالارىندا جانجال تۋىنداعان. جانجال ايەلدىڭ ولىمىمەن اياقتالدى.

ۇزگەن اۋدانىنا قاراستى العا اۋىلىنداعى كيمسان بوتوبەكوۆ اتىنداعى ورتا مەكتەپتىڭ ديرەكتورى ميربەك ابدۋللاەۆ تا 26 مامىر كۇنى وتكەن مەرەكەلىك ءىس-شاراعا قاتىسقانىن ايتىپ, ەشقانداي ەرەكشە جاعداي بايقاماعانىن جەتكىزدى.

«ساعات 9:00-دە باستايمىز دەدى, مەن 9:15-تە باستادىم, 11-دە اياقتادىق. 20 جىل بۇرىن مەكتەپ بىتىرگەن تۇلەكتەر سالتاناتقا قاتىستى, ەشقانداي ماسەلە بولعان جوق, ءوزىم شىعارىپ سالدىم. ولار مەكتەپتەگى كەزدەسۋدەن كەيىن بىردەن كەتىپ قالدى. مارقۇم وتە سابىرلى قىز ەدى, اتا-اناسى دا ەشكىمگە زيان كەلتىرەتىن ادامدار ەمەس», — دەدى ميربەك ابدۋللاەۆ.

27 مامىردا وش وبلىستىق ميليتسياسى تاراتقان اقپاراتقا سايكەس, «ادام ءولتىرۋ» بابى بويىنشا قىلمىستىق ءىس قوزعالىپ, كۇدىكتى قاماۋعا الىندى.

«2024 جىلدىڭ 26 مامىرىندا ۇزگەن اۋداندىق ميليتسياسىنا قارا-قۇلجا اۋدانىندا تۇراتىن 1987 جىلى تۋعان ا.ە. ەسىمدى ازاماتشانىڭ العان جاراقاتتارىنان اۋرۋحاناعا بارا جاتقان جولدا قايتىس بولعانى تۋرالى اقپارات ءتۇستى. بۇل دەرەك تىركەلىپ, قارا-قۇلجا اۋداندىق ىشكى ىستەر بولىمىنە جولداندى. جينالعان ماتەريالداردىڭ نەگىزىندە «ادام ءولتىرۋ» بابى بويىنشا قىلمىستىق ءىس قوزعالدى. تەرگەۋ جۇرگىزىلۋدە. ايەلدىڭ كۇيەۋى, 1985 جىلى تۋعان ا.ب. كۇدىكتى رەتىندە ۇستالىپ, ۋاقىتشا ۇستاۋ يزولياتورىنا قامالدى», — دەلىنگەن رەسمي حابارلامادا.

مارقۇم ايەلدىڭ كەنجە ءسىڭلىسى BBC-ءدىڭ قىرعىز قىزمەتىنە بەرگەن سۇحباتىندا ايەلگە وق ءتيىپ,  قازا تاپقانىن ايتتى.

«كۇيەۋى بىرگە بارىپ, جانىندا تۇرعان. ينتەرنەتتە تاراپ جاتقان ءتۇرلى قاۋەسەتتەر شىندىققا سايكەس كەلمەيدى. اپكەم قىزعانىش تۋعىزاتىنداي ەشنارسە ىستەمەگەن. ەشكىمنىڭ قولىنان ۇستاپ, قولتىقتاسىپ جۇرمەگەن, بي دە بيلەمەگەن. مەكتەپتەگى ءراسىم اياقتالعان سوڭ, ولار بىردەن ۇيگە قايتقان. 20 جىلدىقتى اتاپ وتكەن سوڭ, سىنىپتاستارىمەن ەشقايدا بارماعان. وقيعا كەشكە, ولار ۇيگە ورالعاننان كەيىن بولعان. كۇيەۋى مىلتىقپەن ەكى رەت اتقان, وق وڭ جاق كەۋدە تۇسىنا تيگەن. باسى امان. كەيبىرەۋلەر ايتىپ جۇرگەندەي, ونى اتپەن سۇيرەگەن دەگەن ءسوز — جالعان», — دەيدى مارقۇمنىڭ ءسىڭلىسى.