«نارەستەنىڭ نە كىناسى بار»: تالدىقورعاندا سوتتالعان بۋحگالتەردىڭ ءبىرى – جاس انا

فوتو: ۆيدەودان سكرينشوت

تالدىقورعان قالاسى ءبىلىم ءبولىمىنىڭ جانە مەكتەپتەرىنىڭ 21 بۋحگالتەرى 4,5 ميلليارد تەڭگە بيۋدجەت قاراجاتىن جىمقىرعانى ءۇشىن سوتتالدى. ولاردىڭ ءبىرى – 2 ايلىق بالانىڭ اناسى.

جۋرناليست ساندۋعاش دۇيسەنوۆا نارەستەنىڭ اناسىنا قاتىستى سوت شەشىمىمەن كەلىسپەيتىنىن جازدى.

جوعارعى سوتتىڭ مالىمەتى بويىنشا, ءبىلىم ءبولىمىنىڭ باسشىسى 3 جىلعا جۋىق ۋاقىت ۇرلىقپەن اينالىسقان ارىپتەستەر توبىن باسقارعان. ونىڭ قۇرامىنا ءبولىمنىڭ 7 بۋحگالتەرى جانە 14 مەكتەپ ەسەپشىسى بار.

جۋرناليست جانە بلوگەر ساندۋعاش دۇيسەنوۆانىڭ ايتۋىنشا, سوتتالعان ەسەپشىنىڭ ءبىرى – دانا ءشارىپوۆانىڭ 2 ايلىق بالاسى بار. نارەستە اناسىنىڭ ومىراۋ سۇتىنە مۇقتاج.

«4,6 ملرد تەڭگە جىمقىرۋ ءىسى بويىنشا سوت اياقتالدى. تالدىقورعان ءبىلىم ءبولىمىنىڭ باس بۋحگالتەرى 15 جىلعا باس بوستاندىعىنان ايىرىلدى! ال بالانىڭ اناسى 7 جىلعا سوتتالدى! سىزدە جۇرەك جوق پا?» – دەپ جازدى ول.

ايتا كەتەيىك, سوتتالعانداردان 3 ملرد تەڭگەدەن استام اقشا, زەرگەرلىك بۇيىمدار, جىلجىمايتىن جانە جىلجىمالى م ۇلىك تاركىلەندى.

سوت ۇكىمى ءالى زاڭدى كۇشىنە ەنگەن جوق.