ءبىلىم
وقۋ-اعارتۋ مينيسترلىگى: تەكسەرۋ ناتيجەسىندە 15 لاۋازىمدى تۇلعا جاۋاپكەرشىلىككە تارتىلدى
فوتو: اشىق دەرەككوز
قر وقۋ-اعارتۋ مينيسترلىگى جۇرگىزگەن تەكسەرۋلەردىڭ ناتيجەسىندە 15 لاۋازىمدى تۇلعا اكىمشىلىك جاۋاپكەرشىلىككە تارتىلدى, دەپ جازدى qandastar.kz
بيىلعى جىلدىڭ باسىنان باستاپ قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى 242 ءبىلىم بەرۋ ۇيىمىنا تەكسەرۋ جۇرگىزدى, ونىڭ ىشىندە 108 تەكسەرۋ جەرگىلىكتى جەرلەرگە بارۋ ارقىلى جۇزەگە اسسا, 13 تەكسەرۋ جوسپاردان تىس تۇرعىنداردىڭ ارىز-وتىنىشتەرى نەگىزىندە جۇرگىزىلدى. 2024 جىلدان باستاپ «بالا قۇقىقتارى تۋرالى» قر زاڭىنىڭ 52-1 جانە 52-2-باپتارى كۇشىنە ەندى, مۇندا وبلىستار مەن رەسپۋبليكالىق ماڭىزى بار قالالاردا ءبىلىم بەرۋ ۇيىمدارى مەن باسقارۋ ورگاندارىنا قاتىستى مەملەكەتتىك باقىلاۋدى جۇرگىزۋگە قويىلاتىن جاڭا ءتارتىپ پەن تالاپتار ايقىندالعان. اتالعان جۇمىس بالالاردىڭ قۇقىقتارىن قورعاۋ سالاسىنداعى قۇقىقبۇزۋشىلىق فاكتىلەرىن انىقتاۋعا باعىتتالعان. تەكسەرۋلەر 25 ءبىلىم بولىمىندە جانە وڭىرلەردىڭ سەگىز ءبىلىم باسقارماسىندا جۇرگىزىلدى. ناتيجەسىندە 15 لاۋازىمدى تۇلعاعا سوت شەشىمى بويىنشا اكىمشىلىك ايىپپۇل سالىندى, 65 تۇلعا تارتىپتىك جاۋاپكەرشىلىككە تارتىلدى.
«مينيسترلىك بالالاردىڭ قۇقىقتارىن قورعاۋ سالاسىنداعى جەرگىلىكتى اتقارۋشى ورگاندار تاراپىنان بۇزۋشىلىقتاردى, ونىڭ ىشىندە مەكتەپتەگى اس ءمازىرىنىڭ بەلگىلەنگەن تاماقتانۋ نورمالارىنا سايكەس كەلمەۋى, ساباقتاردى جۇيەلى تۇردە وتكىزەتىن بالالارعا اسەر ەتۋدىڭ ءتيىمدى شارالارىنىڭ بولماۋى, وقۋشىلاردىڭ جەكەلەگەن ساناتتارىنا الەۋمەتتىك كومەك كورسەتۋ ەرەجەلەرىنىڭ ساقتالماۋى جانە ت.ب. فاكتىلەردى تىركەدى. بۇل ماسەلەلەر جەرگىلىكتى بيلىك پەن ءبىلىم بەرۋ ۇيىمدارى تاراپىنان ەرەكشە نازار اۋدارۋدى تالاپ ەتەدى», – دەپ اتاپ ءوتتى كوميتەت توراعاسى ناسىمجان وسپانوۆا.
تەكسەرۋ قورىتىندىسى بويىنشا بالالاردىڭ قۇقىقتارىن قورعاۋ كوميتەتى 121 ۇسىنىم جانە بۇزۋشىلىقتاردى جويۋ تۋرالى 151 نۇسقاما جولدادى. سونداي-اق ۇسىنىمداردىڭ ورىندالۋىن تالداۋ تۇراقتى نەگىزدە جۇزەگە اسىرىلادى, ونىڭ بارىسىندا تۇركىستان, جامبىل جانە قىزىلوردا وبلىستارىندا بەرىلگەن ۇسىنىمداردىڭ ساپاسىز ورىندالۋى انىقتالدى. قر «ءبىلىم تۋرالى» زاڭىنىڭ 6 بابىنا سايكەس بالاباقشالار, مەكتەپتەر, قوسىمشا ءبىلىم بەرۋ ۇيىمدارى جەرگىلىكتى اتقارۋشى ورگانداردىڭ قاراماعىندا. سونداي-اق, اتالعان ۇيىمداردىڭ باسشىلارىن تاعايىنداۋدى اكىمدىكتەردىڭ قۇرىلىمىنداعى ءبىلىم باسقارمالارى جۇزەگە اسىرادى. ايتا كەتەيىك, بالالاردىڭ قۇقىقتارىن قورعاۋ مەن قامتاماسىز ەتۋ جۇمىستارى جالعاسۋدا.
