پاريج اسپانىندا تاعى دا قازاق ءانى قالىقتادى

ءپاريجدىڭ كىشكەنتاي تۇرعىندارى قازاقستانمەن تانىستى. فرانتسۋز استاناسىنىڭ ورتالىعىندا باستاۋىش سىنىپ وقۋشىلارى ءۇشىن كورمە مەن مۋزىكالىق قويىلىم كورسەتىلگەن. «پاريج – بارلىق بوياۋدا» جوباسى 15 جىلدان بەرى الەم ەلدەرىنىڭ مادەنيەتىن پاش ەتىپ كەلەدى. بيىل قازاقستان مەن ۋكراينا تاڭداپ الىنعان.

شارادا ەكى ەلدىڭ ارتىستەرى بىرگە ونەر كورسەتتى. ساحناعا كاسىبي ءانشى-بيشىلەردەن بولەك «راۋان» حالىق ءانسامبلىنىڭ بالالارى دا شىقتى. دومبىراشىلار كۆارتەتى باستاعان ونەرپازدار, قىز ۇزاتۋ ءداستۇرىن تانىستىردى. ەلۆيرا يامانيدي, «FRANCE UNESCO ESPLANADE» قاۋىمداستىعىنىڭ ارت-ديرەكتورى: — ساحنا تورىنە كاسىبي ونەرپازدارمەن قاتار اۋەسقويلار دا شىقتى.

وسىنداي ۇيلەسىمنىڭ بولۋى ماڭىزدى. بۇل قويىلىمداردىڭ بالالار ءۇشىن قىزىقتى قىلا تۇسەدى. گۇلميرا توقتاسىنقىزى, «راۋان» ءانسامبلىنىڭ جەتەكشىسى: — نەگىزى كورەرىمەندەرى سونداي كەرەمەت. ويتكەنى ولار مادەنيەتتى تۇسىنە بىلەدى. ولار ءسىزدىڭ بەرىپ جاتقانىڭىزدىڭ ءبارىن قابىلداپ, جوعارى دارەجەدە قۇرمەتتەپ, سونى قابىلدايدى. سول جاعىنان بىزگە وتە ۇنايدى. فرانتسۋز حالقى مادەنيەت جاعىنان ۇلكەن دارەجەدە. بالالار ءۇشىن دايىندالىپ كەلدىك.

دۇنيەجۇزىندە ءبارى جاقسى, بىراق ەڭ كەرەمەتى – وسى فرانتسۋز بالالارى, ولار مادەنيەتتى تۇسىنەدى, قۇرمەتتەيدى. ەليزا, باستاۋىش مەكتەپ انيماتورى: — بالالارعا بىردەڭەنى ارنايى ءتۇسىندىرۋدىڭ ەش قاجەتى جوق. ەڭ باستىسى ولاردىڭ جۇرەگىنە جول تابا ءبىلۋ قاجەت. مۇنى ءسوزسىز دە جاساۋعا بولادى.