پاريج وليمپياداسىنا ساتىلعان بيلەت سانى رەكوردىق كورسەتكىشكە جەتتى

فوتو: اشىق دەرەككوز

پاريجدەگى وليمپيادا ويىندارىنىڭ اشىلۋ سالتاناتىنا از ۋاقىت قالدى. ءۇش كۇننەن سوڭ تورتجىلدىقتىڭ باستى دوداسى ءوز الاۋىن جاعادى. Olympic.kz الداعى ويىندار جايلى جاڭا ءارى قىزىقتى دەرەكتەردى ۇسىندى.

وليمپيادا كەزىندە تەننيسشىلەر وينايتىن دوپ تانىستىرىلدى. ۇلكەن تەننيستە ەل نامىسىن بەس سپورتشى قورعايدى. «رولان گارروس» ستاديونىندا ەلەنا رىباكينا, يۋليا پۋتينتسەۆا, الەكساندر بۋبليك, الەكساندر شەۆچەنكو جانە الەكساندر نەدوۆەسوۆ (بۋبليكپەن جۇپتاسىپ سىنعا تۇسەدى) ونەر كورسەتەدى.

ايگىلى امەريكالىق رەپەر سنۋپ دوگگ وليمپيادا الاۋىنىڭ ەستافەتاسىنا قاتىسادى. ول 26 شىلدە كۇنى الاۋدى الىپ جۇرمەك. سونداي-اق, ول پاريجدە امەريكالىق NBC ارناسىنىڭ ءتىلشىسى بولىپ جۇمىس ىستەمەك.

وليمپيادا اۋىلى رەسمي تۇردە اشىلعان سوڭ, فرانتسيا پرەزيدەنتى ەممانۋەل ماكرون ارنايى كەلدى. ول وليمپيادانىڭ بۇكىل ەل ءۇشىن ماڭىزدىلىعىن العا تارتىپ, ۇيىمداستىرۋشىلاردىڭ ايانباي ەڭبەك ەتكەنىن اتاپ ءوتتى. سونىمەن قاتار, ەرىكتىلەر مەن سپورتشىلارعا العىس ايتتى.

ازىرگە, ماكروننىڭ سەنا وزەنىندە جۇزۋىنە قاتىستى اقپار جوق. بۇعان دەيىن ول پاريجدەگى بۇل وزەننىڭ قاۋىپسىز ەكەنىن دالەلدەۋ ءۇشىن, ءجۇزىپ شىعاتىنىن ايتقان ەدى. ال پاريج مەرى اننا يدالگو ءوز ۋادەسىندە تۇرىپ, ون مينۋت وزەندە شومىلدى. سەنا وزەنىندە ترياتلون, اشىق سۋدا جۇزۋدەن جارىستار وتەدى.

ال ۇزىنقۇلاقتان جەتكەن مالىمەت بويىنشا, اشىلۋ سالتاناتىندا وليمپيادا الاۋىن جەڭىل اتلەتيكادان ءۇش دۇركىن وليمپيادا چەمپيونى ماري-جوزە پەرەك مەن داڭقتى فۋتبولشى زينەدين زيدان جاعۋى مۇمكىن.

داڭقتى وليمپياداشى, الەم رەكوردشىسى ۋسەين بولت تا وليمپيادادان سىرت قالمايدى. ول ءوزى كىمگە ەرەكشە نازار اۋداراتىنىن دا ايتتى.

«مەنىڭ نازارىما تۇسكەن ءبىر جىگىت بار. ول – امەريكالىق ەرريون نايتون. ول ەندى جيىرماعا تولدى. بىراق وتە مىقتى. ءبارى تالانتتىڭ دامۋىنا بايلانىستى», – دەدى سپرينتەر.

وليمپيادا ويىندارىنا ساتىلعان بيلەت سانى دا رەكوردىق كورسەتكىشكە جەتتى. بۇل تۋرالى حالىقارالىق وليمپيادا كوميتەتى حابارلادى. بۇگىنگە دەيىن 8,8 ميلليون بيلەت ساتىلىپ كەتكەن. بۇعان دەيىنگى رەكورد اتلانتا وليمپياداسىنا تيەسىلى بولاتىن – 8,3 ملن.

2024 جىلعى وليمپيادا ويىندارىنىڭ ۇيىمداستىرۋ كوميتەتىنىڭ باسشىسى توني ەستانگەنىڭ اشىلۋ سالتاناتى تۋرالى از-كەم اقپارات بەردى.

«وليمپيادانىڭ اشىلۋ سالتاناتى قانشالىقتى ماڭىزدى ەكەنىن بىلەمىز. سوندىقتان دا, ءبىز ءاۋ باستان قۇلشىنىسىمىز مىقتى بولدى. بۇل اشىلۋ سالتاناتى ءبىزدىڭ ويىنىمىزدىڭ بار قۇلشىنىسىن كورسەتىپ, فرانتسياداعى  جاقسى  نارسەلەردىڭ ءبارىن پاش ەتكەنىن قالايمىز», – دەدى ول.

سپورتشىلار شەرۋى سەنا وزەنىندە وتەدى. ءاربىر دەلەگاتسيا ءوز قايىعىمەن ءجۇزىپ وتەدى. باعىتتىڭ ۇزاقتىعى التى شاقىرىمدى قۇرايدى.