جاڭالىقتار
پرەزيدەنت ءمادينا ابىلقاسىموۆانى قابىلدادى
فوتو: Akorda
مەملەكەت باسشىسى قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆانى قابىلدادى, دەپ جازادى qandastar.kz
ءمادينا ابىلقاسىموۆا پرەزيدەنتكە قارجى نارىعىن دامىتۋ سالاسىنىڭ بىلتىرعى قورىتىندىلارى تۋرالى ەسەپ بەرگەن.
سونداي-اق بانك سەكتورىندا تۇراقتىلىق ساقتالىپ تۇرعانى جونىندە بايانداعان. 2024 جىلدىڭ باسىنان بەرى بانكتەردىڭ اكتيۆتەرى 19,7 پايىزعا, ياعني 61,6 تريلليون تەڭگەگە دەيىن وسكەن. ەكونوميكانى كرەديتتەۋ 20,9 پايىزعا نەمەسە 33,8 تريلليون تەڭگەگە دەيىن ۇلعايعان. بانكتەردىڭ جۇمىس ىستەمەيتىن اكتيۆتەرى – 3,1 پايىزدان تومەن دەڭگەيدە.
اگەنتتىك 21 بانككە جىل سايىنعى قاداعالاۋ-باعالاۋ جۇمىستارىن اياقتاعان. 11 بانكتىڭ اكتيۆى ساپالىق تۇرعىدان باعالانىپ, سترەسس-تەستىلەۋ جۇرگىزىلگەن. اتالعان شارا بانك جۇيەسى اكتيۆتەرىنىڭ 85 پايىزىن قامتىعان. بۇعان قوسا, 400 ميلليارد تەڭگە كولەمىندە مەملەكەتتىڭ قولداۋ قاراجاتى مەرزىمىنەن بۇرىن قايتارىلعان.
سونىمەن قاتار ءمادينا ابىلقاسىموۆا سترەستىك اكتيۆتەر نارىعىن دامىتۋدى كوزدەيتىن زاڭنامالىق تۇزەتۋلەر قابىلدانىپ, وسى تەكتەس اكتيۆتەردى ساتۋعا ارنالعان العاشقى تسيفرلىق پلاتفورما ىسكە قوسىلعانىن ايتقان.
باسەكەلەستىكتى كۇشەيتۋ ءۇشىن بانك سەكتورىنا وڭتۇستىك كورەيادان, قاتار مەملەكەتىنەن جانە بىرىككەن اراب امىرلىكتەرىنەن شەتەلدىك بانكتەر تارتىلعان.
كەزدەسۋدە مەملەكەت باسشىسىنا ناقتى سەكتور مەن بيزنەس سۋبەكتىلەرىن نەسيەلەۋ تۋرالى دا مالىمەت بەرىلگەن. 2024 جىلى بيزنەسكە بەرىلگەن كرەديتتەر 16,3 پايىزعا نەمەسە 13,1 تريلليون تەڭگەگە دەيىن ۇلعايعان. بۇل رەتتە بيزنەسكە 18,2 تريلليون تەڭگە سوماسىنا جاڭا زايمدار بەرىلگەن.
قاسىم-جومارت توقاەۆتىڭ حالىقتىڭ شامادان تىس كرەديت الۋىن تومەندەتۋ جونىندە بەرگەن تاپسىرماسىنا سايكەس, 2024 جىلعى ماۋسىمدا كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ باعىتىندا زاڭ قابىلداندى. سونىمەن قاتار 614 مىڭ ازاماتتىڭ 210 ميلليارد تەڭگە سوماسىنداعى پروبلەمالىق بەرەشەگى قايتا قۇرىلىمدالعان, ءىشىنارا نەمەسە تولىق كەشىرىلگەن.
اگەنتتىك توراعاسى ازاماتتاردى قارجىلىق الاياقتىقتان قورعاۋ ماقساتىندا زاڭنامالىق تۇزەتۋلەردىڭ جاڭا توپتاماسى ازىرلەنگەنىن دە جەتكىزگەن.
بۇدان بولەك, مەملەكەت باسشىسىنا ساقتاندىرۋ نارىعىن تسيفرلاندىرۋ ناتيجەسى تانىستىرىلعان. ازاماتتاردىڭ تۇرعىن ۇيلەرىن اپات تاۋەكەلدەرىنەن مىندەتتى ساقتاندىرۋ مودەلى ازىرلەنگەن. كرەديتتىك رەيتينگ اگەنتتىكتەرى تۋرالى, ينۆەستيتسيالىق جانە ۆەنچۋرلىق قورلار تۋرالى زاڭ جوبالارى دايىندالعان.
كەزدەسۋ سوڭىندا قاسىم-جومارت توقاەۆ اگەنتتىككە قارجىلىق تۇراقتىلىقتى قامتاماسىز ەتۋ, ناقتى سەكتوردى كرەديتتەۋ اياسىن ودان ءارى كەڭەيتۋ, قارجىلىق قىزمەتتەردە تۇتىنۋشىلاردىڭ قۇقىقتارىن قورعاۋ تەتىكتەرىن كۇشەيتۋ جونىندە بىرقاتار مىندەت جۇكتەگەن.
