ءبىلىم
رەسپۋبليكالىق بيۋدجەت ەسەبىنەن: وقۋ-اعارتۋ مينيسترلىگى بلوگەرلەردەن جارناما ساتىپ الماق
فوتو:istockphoto.com
وقۋ-اعارتۋ مينيسترلىگى قازاقستانداعى جۇمىسشى ماماندىقتارىن جارنامالاۋ ءۇشىن بلوگەرلەردىڭ قىزمەتىنە جۇگىنبەك. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
مينيسترلىك جۇمىسشى ماماندىقتارىنىڭ ءيميدجىن جاقسارتۋ ءۇشىن قازاقستانداعى بلوگەرلەر مەن موبيلوگرافتاردى قولدانباق. ولار Instagram, TikTok جانە Facebook جەلىلەرىندە «جۇمىسشى ماماندىقتارى جىلى» جانە «ەڭبەك ادامى» حەشتەگىمەن پودكاستتار مەن بەينەروليكتەر جاساۋعا شاقىرىلادى.
بۇل پرەزيدەنت توقاەۆتىڭ 2025 جىلدى «جۇمىسشى ماماندىقتارى جىلى» دەپ جاريالاۋىمەن بايلانىستى.
وقۋ-اعارتۋ مينيسترلىگى 2025 جىلعى “جۇمىسشى ماماندىقتارى جىلىن” وتكىزۋ جونىندەگى ءىس-شارالار جوسپارىنىڭ جوباسىن ۇسىندى. «اشىق نقا» پورتالىندا «جۇمىسشى ماماندىقتارىنىڭ يميدجىن ناسيحاتتاۋدىڭ 10 قادامى» ۇسىنىلعان قۇجات جاريالاندى.
«#جۇمىسشى ماماندىقتار جىلى» حەشتەگىمەن ەكونوميكانىڭ ءتۇرلى سالالارىنداعى جۇمىسشىلاردىڭ تابىستارى تۋرالى تانىمال بلوگەرلەرمەن پودكاستتار ءتۇسىرۋ. ەكونوميكانىڭ ءارتۇرلى سالالارىنداعى جۇمىسشى كاسىپتەرى وكىلدەرىنىڭ جەتىستىكتەرى تۋرالى اڭگىمەلەيتىن تانىمال بلوگەرلەردىڭ قاتىسۋىمەن پودكاستتار سەرياسى. «Instagram», «Facebook» جانە باسقا دا تانىمال الەۋمەتتىك جەلىلەردە «TikTok» فورماتىندا جۇمىس ماماندىقتارىنىڭ ارتىقشىلىقتارى مەن مۇمكىندىكتەرىن اشاتىن پوستتار, ونلاين چەلەندجدەر مەن روليكتەر دايىنداۋ”, – دەلىنگەن قۇجاتتا.
مينيسترلىكتىڭ مالىمەتىنشە, ءاربىر شىعارىلىم ءوز سالاسىندا جەتىستىككە جەتكەن بەلگىلى ءبىر ادامنىڭ تاريحىنا ارنالعان بولۋى ءتيىس.
“بلوگەرلەر مەن موبيلوگرافتار اراسىندا «ەڭبەك ادامى» ۇزدىك بەينەسى ءۇشىن كونكۋرس وتكىزۋ. ريلستار (Reels) ارقىلى قىسقا بەينەلەر تاراتۋ ارقىلى جۇمىسشى كادرلاردىڭ وڭ ءيميدجىن قۇرۋ جانە الەۋمەتتىك جەلىلەردە ىلگەرىلەتۋ”, – دەلىنگەن قۇجات جوباسىندا.
وقۋ-اعارتۋ مينيسترلىگى بۇل ءىس-شارالاردىڭ بارلىعىن رەسپۋبليكالىق جانە جەرگىلىكتى بيۋدجەت قاراجاتى ەسەبىنەن قارجىلاندىرۋدى ۇسىنىپ وتىر. ناقتى سومالار ءالى بەلگىسىز.
ەسكە سالساق, بۇعان دەيىن قازاقستاندىق بلوگەرلەر سوڭعى 9 ايدا 1,2 ميلليارد تەڭگە سالىق تولەگەنى تۋرالى جازعان ەدىك.
