«سەكتا ۇستايدى»: اۋىل تۇرعىندارى قاۋىپتى يتتەردى اسىراعان ورتالىققا الاڭداۋشىلىق ءبىلدىردى

فوتو: Stan.kz كوللاجى

الماتى ماڭىنداعى اۋىلدا يتتەردىڭ شابۋىلىنان كەيىن جانجال شىقتى, دەپ جازدى qandastar.kz.

ەندى تۇرعىندار قاۋىپتى جانۋارلاردى ء«دىني سەكتانتتارعا» تيەسىلى ورتالىق ۇستاعانىن ايتىپ, بالالاردىڭ قاۋىپسىزدىگى ءۇشىن الاڭداۋلى.

اۋىل تۇرعىندارىنىڭ ايتۋىنشا, بالالارعا شابۋىل جاساعان يتتەر  «بوستاندىق» اتتى وڭالتۋ ورتالىعىنا تيەسىلى. بۇل ۇيىم جايلى اشىق دەرەككوزدەردە اقپارات از, ال كومپانيالار بازاسىندا مۇلدە تىركەلمەگەن. سوعان قاراماستان, ورتالىق 20 جىلدان استام جۇمىس ىستەيدى. جەرگىلىكتى حالىق ونىڭ ارتىندا «پروتەستانتتىق سەكتا» تۇر دەپ ەسەپتەيدى.

«بۇل سەكتا, ءبارى بىلەدى. ءوزىمنىڭ تۋعان ناعاشىم سول جەردە. تۋىستارىمنىڭ جارتىسى سول جەردە. ولار ەرەكشە كىتاپپەن دۇعا جاسايدى. اي سايىنعى تابىستارىنىڭ 10 پايىزىن جەتەكشىسىنە تاپسىرادى. ءوز كوزىممەن كوردىم. بۇلار كادىمگى حريستياندار دا, مۇسىلماندار دا ەمەس, ءتىپتى باپتيستەر دە ەمەس. ءوز جۇيەلەرى بار», – دەيدى اۋىل تۇرعىنى ءاليا.

شابۋىل بولعان جەردىڭ قاسىندا بالاباقشا ورنالاسقان. جەرگىلىكتى تۇرعىندار قاۋىپسىزدىكتەرى ءۇشىن الاڭدايدى.

«بىزگە كەرەگى – تەك ادىلدىك پەن بالالاردىڭ قاۋىپسىزدىگى», – دەيدى ولار.

تۇرعىنداردىڭ ايتۋىنشا, ورتالىق يەلەرى تەك بالانى قۇتقارىپ قالعان ازاماتقا ەمەس, جابىرلەنۋشىنىڭ وتباسىنا دا قوقان-لوقى كورسەتىپ جاتىر.

جەرگىلىكتى بەلسەندىلەردىڭ سوزىنشە, ەكاتەرينا جالعىزباستى انا, بەس بالاسى بار. ءبىر قىزىن جەرلەگەن, ءبىر ۇلى – ءى توپ مۇگەدەگى. ولار جالدامالى ۇيدە تۇرادى.

«بۇگىن بالانى قاسكەلەڭدەگى جانساقتاۋ بولىمىنەن وبلىستىق اۋرۋحاناعا اۋىستىردى. ەكاتەرينا ءبىر تاۋلىك بالاسىنىڭ قاسىندا بولعان, ونى اپكەسى الماستىردى. ايەل وتە شارشاعان, مورالدىق جانە فيزيكالىق تۇرعىدا كۇيزەلگەن», – دەدى ەرىكتىلەر.

جەرگىلىكتى بەلسەندىلەر مەن ەرىكتىلەر جابىرلەنۋشى وتباسىنا كومەك كورسەتۋ ءۇشىن باستاماشىل توپ قۇرۋعا شەشىم قابىلدادى. ولار ورتالىق يەلەرىنىڭ تاراپىنان قىسىم بولۋى مۇمكىن ەكەنىن, ءىستى «جابۋعا» تىرىساتىنىن جوققا شىعارمايدى.

«قورقىتىپ-ۇركىتۋ نەمەسە ساتىپ الماق بولۋى مۇمكىن. ءبىز بۇعان جول بەرمەيمىز», – دەدى جەرگىلىكتى بەلسەندىلەر.