Socieux+ saraptama ortalyǵy Qazaqstanda áleýmettik jobalardy júzege asyrady

EýroOdaqtyń halyqty jumyspen qamtý jáne eńbekti qorǵaý máseleleri jónindegi Socieux+ saraptama ortalyǵy Qazaqstanmen áleýmettik jobalardy júzege asyrýdy jalǵastyrmaq.

Socieux+ mamandary Almaty men Astanadaǵy úkimettik emes uıymdarǵa áleýmettik jobalardy monıtorıng jasaý, baǵalaý júıesin jetildirý boıynsha keńes bergen. Sondaı-aq, ata-ana qamqorlyǵynan aıyrylǵan balalardy patronattyq tárbıeleý júıesin qurýǵa qatysty tájirıbesimen bólisken.

«SOCIEUX + sońǵy jyldary qazaqstandyq uıymdarmen, onyń ishinde Bala quqyqtary jónindegi ýákil ınstıtýtymen, Azamattyq bastamalardy qoldaý ortalyǵymen, Eńbek resýrstaryn damytý ortalyǵymen, Astana qalasynyń jumyspen qamtý jáne áleýmettik qorǵaý departamentimen, sondaı-aq Ekonomıkalyq zertteýler ınstıtýtymen yntymaqtastyqta jemisti nátıjelerge qol jetkizdi. Qazirgi kezde bul Ortalyq Qazaqstanda áleýmettik qorǵaýdy, eńbekti qorǵaýdy jáne halyqty jumyspen qamtýdy jaqsartý salasynda  5 jobany sátti aıaqtady», – dep atap ótti QR Belgııadaǵy tótenshe jáne ókiletti elshisi Marǵulan Baımuhan.