Soltústik Qazaqstanda sheneýnik 15,9 mln teńge jymqyrǵan

Taıynsha aýdanynyń turǵyn úı-kommýnaldyq sharýashylyq bóliminde júrgizilgen tekserý barysynda atalǵan mekeme basshysynyń 15,9 mln teńge kóleminde bıýdjettik qarajatty jymqyrǵany anyqtaldy, dep habarlaıdy Qandastar.kz

Tergeý barysynda laýazymdy tulǵanyń Taıynsha qalasyndaǵy áleýmettik mańyzy bar nysandardy jylýmen qamtamasyz etý úshin modýldik qubyr ótkizgishke arnalǵan qurylǵyny satyp alý maqsatynda kásipkermen bir kózden memlekettik satyp alý shartyna jalǵan túrde qol qoıǵany belgili boldy. Bul rette kásipker ózine qatysty quqyqqa qaıshy áreketter týraly habarsyz bolǵan.

«Anyqtalǵan zańbuzýshylyqtar boıynsha 2024 jylǵy 6 shildede aýdan prokýratýrasymen Qylmystyq kodekstiń 189-baby 4-bóliginiń 2-tarmaǵy (senip tapsyrylǵan bóten múlikti ıemdený nemese ysyrap etý) boıynsha sotqa deıingi tergep-tekserý bastaldy.

2025 jylǵy 30 maýsymdaǵy Taıynsha aýdandyq sotynyń úkimimen Bólim basshysy joǵaryda atalǵan qylmysty jasaǵany úshin kináli dep tanylyp, oǵan memlekettik qyzmette, sot júıesinde, jergilikti ózin-ózi basqarý organdarynda, Ulttyq Bankte jáne onyń qurylymdarynda, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, sondaı-aq memlekettik uıymdar men kvazımemlekettik sektor sýbektilerinde laýazym atqarýǵa ómir boıy tyıym sala otyryp, 8 jyl merzimge bas bostandyǵynan aıyrý jazasy taǵaıyndaldy», — delingen habarlamada.