سۋ تاسقىنى كەزىندە اقشا جيناعان: قايىرىمدىلىق قورى ناۋقاس بالالارعا بەرىلگەن 44 ملندى قالتاعا باسقان

فوتو: اشىق دەرەككوز

ول اۋىر ناۋقاس بالالار ءۇشىن بۇكىل الەم جيناعان اقشانى جىمقىرعان, دەپ جازادى qandastar.kz

اقتوبە قالالىق No2 سوتىندا «مورە Life» قايىرىمدىلىق قورىنىڭ ديرەكتورى بيبىگۇل جۋليناعا سوت ۇكىمى شىقتى. سوت ونى بارلىق باپ بويىنشا اسا ءىرى كولەمدە الاياقتىق جاساعانى ءۇشىن كىنالى دەپ تاۋىپ, التى جارىم جىلعا باس بوستاندىعىنان ايىردى. ۇكىمدە ايتىلعانداي, ەكى جىل ىشىندە – 2022-2024 جىلدار ارالىعىندا جۋلينا 43 ميلليون 889 مىڭ 429 تەڭگەنى جىمقىرعان.

بيبىگۇل جۋلينا بيىل ءساۋىر ايىندا ۇستالعان بولاتىن. ءىس بويىنشا جەتى جابىرلەنۋشى بولعان. ءبىر جاعدايدا بۇيرەك جەتكىلىكسىزدىگى بار 4 جاسار قىز بالاعا جەدەل ورگان ترانسپلانتاتسياسى قاجەت بولدى. قازاقستاندا دونور تابىلماعان. بۇل بەلارۋستە جاسالۋى مۇمكىن ەدى. وپەراتسياعا 30 ميلليون تەڭگە قاجەت بولدى. قىزدىڭ اناسى الميرا امانعۇسوۆا «More Life» قورىنا حابارلاسقان. جيناق ءساتتى ءوتتى. قور قىز بەن ونىڭ اناسىنا بەلورۋسسياعا بيلەتتەر ساتىپ العان.

قور ءتىپتى تولەمگە قاتىستى ەسەپ قۇجاتتارىن ەمحاناعا جىبەرگەن. بىراق بەلگىلى بولعانداي, قۇجاتتار جالعان بولىپ شىقتى. وپەراتسيانى كۇتىپ جۇرگەندە بالا قاتتى ناۋقاستانعان. قازاقستان ەلشىلىگىنىڭ ارالاسۋىنان كەيىن دارىگەرلەر قيىن جاعدايدان ساقتاعان. وسى ۋاقىتقا دەيىن بالا گەمودياليزدىڭ ارقاسىندا عانا امان.

الدانعانداردىڭ اراسىندا بيبىگۇل جۇلينانىڭ اپكەسى ءنازيرا جاۋعاش تا بار. ايەل قورعا 2022 جىلدىڭ ناۋرىز ايىندا جۇگىنگەن. ونىڭ ەكى مۇمكىندىگى شەكتەۋلى بالاسى بار. قورمەن شارت جاساسقان سوڭ ول دا اقشانىڭ ءبىر بولىگىن جيناپ, ءوز قاراجاتىن قوسقان. سودان كەيىن ول جۋلينامەن بىرگە ءبىر بالاسىن تۇركياعا جىبەردى.

بىراق نازيرانىڭ ايتۋىنشا, جۋلينانىڭ ۋادە ەتكەن ەمىنىڭ ورنىنا ەمحانا وعان اقتوبەدە تەگىن ەمدەلۋگە بولاتىن ەمدىك ەم جۇرگىزگەن. نازيرانىڭ ايتۋىنشا, جۋلينا بۇل فيزيوتەراپيانىڭ قۇنىن  جوعارى باعالاعان. كەيىن ەمحانادان قۇجاتتاردى العان ءنازيرا ەمنىڭ الدەقايدا ارزان ەكەنىن بىلگەن. بۇدان بولەك بىرنەشە ءىس سوتتىڭ قاراۋىندا بولدى. سوت ۇكىمىنە قاتىستى جابىرلەنۋشىلەردىڭ وكىلى ازات حايرۋللين مىناداي پىكىر ءبىلدىردى.

«قىلمىستىق ءىس قوزعاۋعا ەكى جىلدان استام ۋاقىت كەتتى. قۇقىق قورعاۋ ورگاندارى ازاماتتىق-قۇقىقتىق قاتىناستاردى سىلتاۋراتتى. پوليتسيا بۇل ماسەلەنى زەرتتەگىسى كەلمەدى. بىراق ءبىز جۋلينانىڭ بالالاردىڭ ەمدەلۋدەن, قاجەتتى وتا جاساۋ مۇمكىندىگىنەن ايىرعانىن دالەلدەي الدىق. بەلگىلى بولعانداي, جۋليناعا بۇعان دەيىن دە بىرنەشە رەت الاياقتىق بابى بويىنشا ايىپ تاعىلعان. مۇنداي ادام قايىرىمدىلىق قورىن باسقاردى. مەنىڭ ويىمشا, جۋلينا ۇكىمىنە شاعىم تۇسىرەدى. بىراق جابىرلەنۋشىلەر بۇل ۇكىمدى بارلىق ينستانتسيالاردا قورعاۋعا دايىن.  جۋليناعا قاتىستى قىلمىستىق ءىس تەرگەلىپ جاتقاندا دا قور قىزمەتىن جالعاستىرىپ, اقتوبە وبلىسىنداعى سۋ تاسقىنىنان زارداپ شەككەندەرگە اقشا جيناۋدى بەلسەندى جۇرگىزگەنىن ايتقىم كەلەدى», – دەدى ول.