سۋديا شەرزات ءولىمى بويىنشا سوت وتىرىسىن سىناعان بلوگەرلەرگە ەسكەرتۋ جاسادى

ەفيردەن سكرينشوت

شەرزات پولاتتىڭ ولىمىنە قاتىستى سوت وتىرىسى جالعاسىپ جاتىر. سۋديا ەرجان جانۇزاقوۆ سوت وتىرىسى تۋرالى پىكىر ءبىلدىرىپ, قۇقىقتىق باعا بەرگەن بلوگەرلەرگە ەسكەرتۋ جاسادى. بۇل تۋرالى Stan.kz اقپارات اگەنتتىگى حابارلايدى.

سۋديا سوت وتىرىسىن ەسكەرتۋدەن باستادى. سوزىنشە, ىسكە مۇلدەم قاتىسى جوق تۇلعالار سوت تالقىلاۋى مەن تەرگەۋگە قاتىستى جەكە پىكىرىن ءبىلدىرىپ, سۋبەكتيۆتى باعا بەرۋگە قۇقىعى جوق.

“كونستۋتسيانىڭ 75-بابىنىڭ 1-تارماعىنا سايكەس, سوت تورەلىگىن تەك سوت ىسكە اسىرادى. سوت ىسىنە قانداي دا ءبىر ارالاسۋعا جول بەرىلمەيدى. زاڭدى تارتىپتە ول ءۇشىن جاۋاپكەرشىلىك قاراستىرىلعان. ۇكىم زاڭدى كۇشىنە ەنگەنگە دەيىن سوت پروتسەسىن تۇسىندىرۋگە, قۇقىقتىق باعا بەرۋگە بەرىلمەيدى. سوت ءبارىن جان-جاقتى, وبەكتيۆتى زەرتتەۋگە مىندەتتى. ءىستى قارايتىن سۋديا تاۋەلسىز جانە وبەكتيۆتى, جەكە مۇددەلىلىگى بولماۋى جانە بىرەۋدىڭ ىقپالىنا تۇسپەۋى ءتيىس. ول ءبارىن زاڭ اياسىندا شەشەدى. سوت تەرگەۋ ساتىسىندا, قورىتىندى ۇكىم شىعارىلعان جوق”, – دەدى سۋديا.

ول ۇكىم شىققانعا دەيىن سۋدياعا سىن ايتۋعا بولمايتىنىن ايتىپ ەسكەرتۋ جاسادى. سوزىنشە, بۇل سۋدياعا قىسىم كورسەتۋ دەپ باعالانىپ, ول ءۇشىن جازاعا تارتىلۋى مۇمكىن.

بۇل ادۆوكات دجوحار وتەبەكوۆكە قاتىستى ايتىلسا كەرەك. ول بۇعان دەيىن سوت پروتسەسىنە قاتىستى بىرنەشە مارتە ءوز باعاسىن بەرگەن ەدى.

ەسكە سالايىق, بۇعان دەيىن 6 مامىردا وتكەن سوت وتىرىسىندا ايىپتالۋشىلاردىڭ ءبىرى دارحان اسكەنتاي 4 قازان كۇنى «قاماجاي» دۇكەنىنە سىرا الۋعا بارعانىن ايتىپ, شەرزات بولاتتىڭ ولىمىنە اكەلگەن توبەلەسكە قاتىسپاعانىن مالىمدەدى. ونىڭ ايتۋىنشا, شەرزات كاستەتپەن ۇرىپ جىبەرىپ, كەيىن جاعدايى ناشارلاعان سوڭ دوسى نۇربول توقتابايدى شاقىرعان. توبەلەستىڭ باستالۋىنا قارجاۋبايدىڭ پىشاقپەن شىعۋى جانە شەرزاتتىڭ بىرەۋدى ۇرۋى سەبەپ بولدى دەيدى. دارحان تەرگەۋ كەزىندە قىسىم كورسەتىلگەنىن, قورعاۋشىسى بولماعانىن, سوندىقتان شىندىقتى ەندى ايتىپ جاتقانىن جەتكىزدى. ول وقيعاعا قاتىسقان كەيبىر كۇدىكتىلەردى تانىمايتىنىن, ەشكىمدى ۇرماعانىن, توبەلەسكە ارالاسپاعانىن ايتتى. تەرگەۋ كەزىندەگى ايىپتاۋلارمەن كەلىسپەيتىنىن, بۇل كەزدەيسوق بولعان وقيعا ەكەنىن, تەك ءوز ارەكەتى ءۇشىن جاۋاپ بەرۋگە دايىن ەكەنىن مالىمدەدى.