Túrkistan oblysy Dezınfekııa ortalyǵynyń bas dırektory sottaldy

Foto: ashyq derekkóz

Shymkent qalasynyń qylmystyq ister jónindegi aýdanaralyq soty «Túrkistan oblysy boıynsha dezınfekııa ortalyǵy» ShJQ RMK fılıalynyń bas dırektory K.Tóregeldıevke jáne jeke kompanııanyń basshysy D.Ozyqbaevqa qatysty úkim shyǵardy. Bul týraly Antıkor óziniń resmı Telegram-arnasynda habarlady, dep jazady Qandastar.kz.

Tóregeldıev alaıaqtyq, para berýge ıtermeleý jáne nemquraılyq tanytqany, al Ozyqbaev para berýge oqtalǵany úshin kináli dep tanyldy.

Tóregeldıev RMK-da júrgizilip jatqan aýdıtorlyq tekserý jónindegi máseleniń sheshimin oń jaqty etkeni úshin laýazymdy tulǵalarǵa para berý syltaýymen Ozyqbaevtyń 500 myń teńge somasyndaǵy aqshalaı qarajatyn alaıaqtyq jolmen ıemdengeni anyqtaldy.

Sondaı-aq Tóregeldıev óz mindetterin tıisinshe oryndamaý nátıjesinde oryndalǵan jumystardyń aktilerine ony naqty oryndalmaı qol qoıdy, sol arqyly memleketke 2,2 mln teńge somaǵa zalal keltirdi.

Sot úkimimen Tóregeldıevke 3 jyl merzimge bas bostandyǵynan aıyrý túrindegi jaza, Ozyqbaevqa 7,5 mln teńge kóleminde aıyppul taǵaıyndaldy.

Sonymen qatar atalǵan adamdar memlekettik qyzmette laýazymdardy atqarý quqyǵynan ómir boıy aıyryldy. Úkim zańdy kúshine engen joq.