بيزنەس جاڭالىقتارجاڭالىقتارقارجى جانە تولەمدەر
ۇكىمەت ءىرى كاسىپورىندارمەن كەلىسسوز جۇرگىزبەك
پرەمەر-مينيستر ولجاس بەكتەنوۆ سالىق كودەكسىنىڭ جوباسىن قايتا جازىپ, فيلوسوفياسىن وزگەرتۋ قاجەت دەپ ەسەپتەيدى. 7 اقپانداعى ۇكىمەتتىڭ كەڭەيتىلگەن وتىرىسىندا ايتىلعان تاپسىرمالاردى ىسكە اسىرۋ ماسەلەلەرى جونىندەگى كەڭەستە ول ساراپشىلار مەن بيزنەس قوعامداستىقتاردىڭ پىكىرىن ەسكەرۋ قاجەت ەكەنىن ايتتى.
سونداي-اق ۇكىمەت باسشىسى ونەركاسىپتىڭ دامۋىنا جاڭا سەرپىن بەرۋدى كوزدەيتىن بىرقاتار ناقتى مىندەتتەردى بەلگىلەپ, ءبىرىنشى ۆيتسە-پرەمەر رومان سكليارعا 10 كۇن ىشىندە بارلىق ءىرى ونەركاسىپ كاسىپورنى يەلەرىمەن, ءبىرىنشى كەزەكتە ءوندىرۋشى سالالارداعى كاسىپورىندارمەن كەلىسسوزدەر جۇرگىزۋدى تاپسىردى.
ەڭ تومەنگى جالاقى جاڭاشا ەسەپتەلۋى مۇمكىن
قازاقستاندا ەڭ تومەنگى جالاقى جاڭا ءادىس-تاسىلمەن ەسەپتەلۋى مۇمكىن. قر كاسىپوداقتار فەدەراتسياسى مالىمەتىنشە, ەگەر جۇمىس بەرۋشىلەر جالاقىنى 7-10%-عا كوتەرەمىز دەسە, بۇل – شىن مانىندە يندەكستەۋ. ول – ايلىقتى كوتەرۋ دەگەن ءسوز ەمەس. كاسىپوداقتار فەدەراتسياسى يندەكستەۋدى زاڭنامالىق تۇرعىدان رەتتەۋدى تالاپ ەتەدى. بۇل – الەمدىك تاجىريبە.
ەلىمىزدە ەڭ تومەنگى جالاقى ۇزاق ۋاقىت بويى 24 مىڭ تەڭگە, 2020 جىلدان باستاپ 42 مىڭ تەڭگە, سودان كەيىن 60 مىڭ تەڭگە بولدى. ەڭ تومەنگى جالاقىنى ەسەپتەۋ ادىستەمەسى بولعان جوق. حالىقارالىق ەڭبەك ۇيىمى ماقۇلداعان يندەكس بار. مىسالى, ۇكىمەت قازاقستاندا ورتاشا جالاقى 300 مىڭ تەڭگە دەپ مالىمدەسە, وندا ەڭ تومەنگى جالاقى وسى سومانىڭ 50%-ى بولۋى ءتيىس.
Tech Girls باعدارلاماسى ىسكە قوسىلدى
جاڭا باعدارلاما قىز-كەلىنشەكتەردىڭ تسيفرلىق ءبىلىمىن ارتتىرۋعا ارنالعان.
قر پرەزيدەنتى جانىنداعى ايەلدەر ىستەرى جانە وتباسى-دەموگرافيالىق ساياسات جونىندەگى ۇلتتىق كوميسسيا مالىمەتىنشە, باعدارلاما ۇلتتىق كوميسسيانىڭ, Astana Hub حالىقارالىق تەحنوپاركى جانە Techno Women قاۋىمداستىعىنىڭ باستاماسىمەن جۇزەگە اسىپ جاتىر.
باعدارلامانىڭ ماقساتى – قىزداردىڭ تسيفرلىق ءبىلىمىن ارتتىرۋ, كودسىز جانە تومەن كودتى باعدارلامالاۋ نەگىزدەرىن ۇيرەتۋ جانە قىزداردى STEM-گە تارتۋعا ىقپال ەتۋ. سونداي-اق باعدارلاما اياسىندا قىزدار مانساپتى جوسپارلاۋ, قۇرۋ, سۇحباتتان ءوتۋ جانە وزدەرى ارمانداعان جۇمىسقا تۇرۋ تۋرالى ءبىلىم الادى. بۇل ونلاين رەجيمدە وتەتىن تەگىن باعدارلاما جانە 16 مەن 25 جاس ارالىعىنداعى قىزدارعا ارنالعان.
