Vengrııalyq kompanııa Qazaqstanda jem shyǵaratyn zaýyt salýdy kózdep otyr

Basqarma tóraǵasy Rýslan Ibraımov vengrııalyq UBM Group kompanııasynyń ókilderimen kezdesti, dep habarlaıdy ulttyq kompanııanyń baspasóz qyzmeti. Kezdesý barysynda taraptar Qazaqstanda jyldyq qýattylyǵy keminde 200 myń tonna quraıtyn jem zaýytyn salý múmkindigin talqylady.

UBM Group ókili, doktor Pıter Zoltan Qazaqstannyń strategııalyq ornalasýyn, qolaıly jaǵdaılaryn jáne shıkizat resýrstarynyń qoljetimdiligin eskere otyryp, óndiristi iske qosýdyń aıtarlyqtaı áleýetin atap ótti. Ol kompanııanyń Qazaqstandaǵy mal sharýashylyǵyndaǵy óndiris pen basqarý júıesin damytýǵa eleýli úles qosýǵa daıyn ekenin basa aıtty.

UBM Group Vengrııadaǵy qurama jemniń jetekshi óndirýshisi bolyp sanalady, sonymen qatar mal sharýashylyǵymen jáne astyq saýdasymen aınalysady. Kompanııa quramyna 18 enshiles uıym kiredi, olardyń ónimderi 15 elge eksporttalady.