جاس ماماندارعا جەكە برەندتى دامىتۋدىڭ ماڭىزى ءتۇسىندىرىلدى

ماڭعىستاۋلىق جاس ماماندار «جاس باسقارۋشىلار» مەكتەبى اياسىندا «جەكە برەند. SMM» تاقىرىبى بويىنشا بىلىكتىلىگىن ارتتىردى. وقىتۋعا 100 جاس مامان قاتىستى. ولار قر جۋرناليستەر وداعىنىڭ مۇشەسى, مەدياترەنەر التىنگۇل مەڭدىحاننان ءبىلىم الدى.

قازىرگى تاڭدا جەكە برەند كەز كەلگەن سالا مامانىنا قاجەت. ءوزىنىڭ ءبىلىمى مەن تاجىريبەسىن جەكە برەندكە يكەمدەۋ ارقىلى كوپتىڭ قىزىعۋشىلىعىن وياتا الادى.

ترەنەردىڭ ايتۋىنشا, مۇعالىمدەر جاڭا داعدىنى مەڭگەرىپ, ونى ءوز سالاسىندا ءتيىمدى قولدانا السا, وقۋشىلاردىڭ دا نازارىن ءبىلىم الۋعا باعىتتار ەدى. سونىمەن قاتار جەكە برەندى بار مۇعالىم ءوز جوبالارىن وڭاي ۇسىنىپ, جوعارى كورسەتكىشكە قول جەتكىزە الاتىنىن تىلگە تيەك ەتتى.

مۇنان بولەك وقىتۋ بارىسىندا مەدياساۋات, الەۋمەتتىك جەلىدەگى ەتيكا, كيبەربۋللينگ تاقىرىپتارى ءسوز بولدى. تەلەفون قولداناتىن جاننىڭ بارلىعى اقپاراتتى تاراتۋدا مەدياەتيكانى ساقتاۋى كەرەك ەكەنى ايتىلدى. ال اقپاراتتاردى وقىپ, ونى قابىلداۋدا سىني ويلاۋ داعدىسى مەن فاكتچەكينگ جاساۋدىڭ ماڭىزدىلىعى ءسوز بولدى.

«بۇگىنگى ساباقتا جەكە برەندتىڭ ماڭىزى مەن ونىڭ قالىپتاستىرۋدىڭ جولىن ۇيرەندىك. وقىتۋعا قاتىسقان جاس ماماندار الداعى ۋاقىتتا جەكە برەندى دامىعان مىقتى مۇعالىم, بىلىكتى كادر بولىپ جەتىلۋى ءۇشىن قازىردەن باستاپ تىڭباي ەڭبەك ەتۋ قاجەت ەكەنىن تۇسىندىك. وقىتۋ وتە قىزىقتى ءوتتى جانە الەۋمەتتىك جەلىنىڭ قىر-سىرىن مەڭگەرۋىمىزگە سەپتىگىن تيگىزدى. ۇيىمداستىرۋشىلار مەن مەدياترەنەرگە العىسىمىز شەكسىز», — دەدى جاس مامان مارات قاني.

ايتا كەتەيىك, وقىتۋدى «7 جۇرت» قوعامدىق بىرلەستىگى ماڭعىستاۋ وبلىسى ءبىلىم باسقارماسىنىڭ تاپسىرىسى نەگىزىندە ازاماتتىق باستامالاردى قولداۋ ورتالىعىمەن بىرلەسە ۇيىمداستىردى. نەگىزگى ماقسات – مۇعالىمدەردىڭ بىلىكتىلىگى مەن بەلسەندىلىگىن ارتتىرۋ, جاڭا داعدى قالىپتاستىرۋ ارقىلى كوشباسشى قالىپتاستىرۋ.