Jańalyqtar
Jas mamandarǵa jeke brendti damytýdyń mańyzy túsindirildi
Mańǵystaýlyq jas mamandar «Jas basqarýshylar» mektebi aıasynda «Jeke brend. SMM» taqyryby boıynsha biliktiligin arttyrdy. Oqytýǵa 100 jas maman qatysty. Olar QR Jýrnalıster Odaǵynyń múshesi, medıatrener Altyngúl Meńdihannan bilim aldy.
Qazirgi tańda jeke brend kez kelgen sala mamanyna qajet. О́ziniń bilimi men tájirıbesin jeke brendke ıkemdeý arqyly kóptiń qyzyǵýshylyǵyn oıata alady.
Trenerdiń aıtýynsha, muǵalimder jańa daǵdyny meńgerip, ony óz salasynda tıimdi qoldana alsa, oqýshylardyń da nazaryn bilim alýǵa baǵyttar edi. Sonymen qatar jeke brendi bar muǵalim óz jobalaryn ońaı usynyp, joǵary kórsetkishke qol jetkize alatynyn tilge tıek etti.
Munan bólek oqytý barysynda medıasaýat, áleýmettik jelidegi etıka, kıberbýllıng taqyryptary sóz boldy. Telefon qoldanatyn jannyń barlyǵy aqparatty taratýda medıaetıkany saqtaýy kerek ekeni aıtyldy. Al aqparattardy oqyp, ony qabyldaýda synı oılaý daǵdysy men faktchekıng jasaýdyń mańyzdylyǵy sóz boldy.
«Búgingi sabaqta jeke brendtiń mańyzy men onyń qalyptastyrýdyń jolyn úırendik. Oqytýǵa qatysqan jas mamandar aldaǵy ýaqytta jeke brendi damyǵan myqty muǵalim, bilikti kadr bolyp jetilýi úshin qazirden bastap tyńbaı eńbek etý qajet ekenin túsindik. Oqytý óte qyzyqty ótti jáne áleýmettik jeliniń qyr-syryn meńgerýimizge septigin tıgizdi. Uıymdastyrýshylar men medıatrenerge alǵysymyz sheksiz», — dedi jas maman Marat Qanı.
Aıta keteıik, oqytýdy «7 Jurt» qoǵamdyq birlestigi Mańǵystaý oblysy bilim basqarmasynyń tapsyrysy negizinde Azamattyq bastamalardy qoldaý ortalyǵymen birlese uıymdastyrdy. Negizgi maqsat – muǵalimderdiń biliktiligi men belsendiligin arttyrý, jańa daǵdy qalyptastyrý arqyly kóshbasshy qalyptastyrý.
