5000 قازاقستاندىق جاس سپورت الاڭدارىن تازارتتى

فوتو: دالا قىراندارى

بۇگىن استاناداعى ترياتلون ساياباعى مەن باسقا دا قالالارداعى سپورت الاڭدارى ەرەكشە قوزعالىسقا تولدى. ەلىمىزدىڭ 20-دان استام قالاسىندا LED-ەكران ارقىلى تىكەلەي كورسەتىلگەن #جاتتىعۋ جوباسى جاڭا ماۋسىمىن اشتى.

بۇل ەل بويىنشا 5000-عا جۋىق جاستىڭ ءبىر ۋاقىتتا ءبىر ريتممەن قيمىلداپ, تازالىق پەن تارتىپكە ءۇن قوسقان كۇن بولدى. #جاتتىعۋ – بۇل جاي عانا تاڭعى دەنە جاتتىعۋى ەمەس. بۇل – جاستاردىڭ جاۋاپكەرشىلىك پەن قوعامعا قىزمەت ەتۋ مادەنيەتىن قالىپتاستىرۋعا ارنالعان قوزعالىسى. 2022 جىلى «دالا قىراندارى» ۇيىمىنىڭ باستاماسىمەن ىسكە قوسىلعان بۇل جوبا بۇگىندە مىڭداعان جاسقا ۇلگى بولىپ وتىر.

استاناداعى ءىس-شارانى اشقان ۇيىم ۇيلەستىرۋشىسى نۇرعالي تۇرسىنعازيەۆ «تازا قازاقستان» تۇجىرىمداماسىنىڭ ءمانىن ەرەكشە اتاپ ءوتتى, دەپ جازدى qandastar.kz

«قازاقستاننىڭ قانشالىقتى تازا بولاتىنى – وزىمىزگە بايلانىستى. تازالىق جيناعان جەردە ەمەس, لاستامايتىن جەردە بولادى. ءبىز اۋلادان باستاپ, قالامىزعا دەيىن جاۋاپكەرشىلىكتى ءوز موينىمىزعا الامىز. بۇل – ءبىزدىڭ ءومىر سالتىمىز بولۋى ءتيىس», – دەدى ول.

ءسويتىپ نۇرعالي تۇرسىنعازيەۆ جاتتىعۋعا ستارت بەرىپ, ەلوردالىق قىراندارمەن بىرگە سەرگىتۋ جاتتىعۋىن باستادى. جاتتىعۋدان كەيىن قاتىسۋشىلار بىردەن سەنبىلىككە كوشتى. پارك اۋماعى تازارتىلىپ, سپورت جابدىقتارى جاڭارتىلدى. ءار جاتتىعۋ الاڭىندا اقپاراتتىق تاقتالار ورناتىلىپ, ەندى ول جەردە قالا تۇرعىندارىنا ارنالعان تەگىن جاتتىعۋ كەستەسى جاريالانىپ وتىرادى. ءىس-شارا قاتىسۋشىسى, ۇيىمنىڭ بەلسەندى مۇشەسى ساعيدا زەيناديلوۆا سپورتتىق جيىنعا قاتىستى ويىن ايتتى.

«جاتتىعۋ قۇرىلعىلارى سىنباسىن, بالالار ءۇشىن قاۋىپسىز ورتا قالىپتاسسىن دەسەك — تازالىق پەن ءتارتىپتى ساقتاۋ مادەنيەتكە اينالۋى كەرەك. ءبىز ءار اۋلادا ۇلگى كورسەتكىمىز كەلەدى. بۇگىن بىزبەن بىرگە 5000 جاس قازاقستاننىڭ تۇكپىر-تۇكپىرىندە ءوز الاڭىن تاڭدادى. ەندى ءاربىر الاڭعا «قىراندار» جاۋاپتى بولادى», – دەدى ول.

#جاتتىعۋ جوباسى قازاقستان رەسپۋبليكاسىنىڭ تۋريزم جانە سپورت مينيسترلىگىنىڭ رەسمي قولداۋىمەن جۇزەگە اسىپ كەلەدى. 2024 جىلى جاسالعان مەموراندۋم ناتيجەسىندە جوبانىڭ اۋقىمى كەڭەيىپ, تەك فيزيكالىق بەلسەندىلىك ەمەس, قوعامدىق سانا مەن ورتاق جاۋاپكەرشىلىككە باسىمدىق بەرىلىپ كەلەدى.

استانادان باستالعان جاتتىعۋ ەستافەتاسى شىمكەنت, قاراعاندى, ورال, سەمەي سياقتى قالالارعا تارالىپ, ءبىر كۇندە 5000-نان استام جاس ورتاق ميسسيانى قولعا الدى – ءوز قالاسىن, ءوز اۋلالارىن تازا, قاۋىپسىز ءارى تارتىمدى ەتۋ.