الماتىعا بيىل ەكى ءجۇز جاڭا اۆتوبۋس جەتكىزىلەدى

الماتىعا جىل سوڭىنا دەيىن قىتايدان ەكى ءجۇز جاڭا اۆتوبۋس جەتكىزىلەدى. بۇل تۋرالى باقىتجان ساعىنتاەۆ جەتىسۋ اۋدانىنىڭ تۇرعىندارىمەن كەزدەسۋ بارىسىندا ايتتى, دەپ حابارلايدى قازاقپارات ءتىلشىسى.

الماتى اكىمى باقىتجان ساعىنتاەۆ جەتىسۋ اۋدانىنىڭ تۇرعىندارىمەن كەزدەستى. قالا باسشىسى مەگوپوليستەگى قوعامدىق كولىكتىڭ جەتىسپەۋشىلىك  ماسەلەسى الداعى ۋاقىتتا تولىقتاي شەشىلەتىنىن اتاپ ءوتتى. «بيىل ءبىز قىتايدان 200 اۆتوبۋس  الامىز. قوعامدىق كولىك ءجيى جۇرەتىن بولادى. اۆتوبۋس ارالىقتارىن 10-15 مينۋتقا دەيىن قىسقارتۋ كەرەك. سوندا ءبىز قوعامدىق كولىك جەتىسپەۋشىلىگىن تۇبەگەيلى شەشەمىز», – دەدى باقىتجان ساعىنتاەۆ. سونداي-اق, الماتى اكىمى بىلىكسىز اۆتوبۋس جۇرگىزۋشىلەر جايلى پىكىر ءبىلدىردى. «قالادا اۆتوبۋس جۇرگىزۋشىلەرىنە قاتىستى پروبلەما بار.  تاجىريبەلى جۇرگىزۋشىلەر جوقتىڭ قاسى. جۇمىسقا كىم بولسا سونى الادى. كەيبىر جۇرگىزۋشلەر سول پاركتەردە تۇنەيدى, سوسىن رولدە قالعىپ وتىرادى. بۇنىڭ  بارلىعى جولداعى قاۋىپسىزدىككە قاۋىپ توندىرەدى», – دەدى اكىم. سونىمەن قاتار  قالا باسشىسى تروللەيبۋس پاركتەرىن دە جاڭارتاتىنىن ايتتى.

دەرەككوز: inform.kz/