قازاقستاندىقتار مەسسەدجەرلەر ارقىلى انىقتامالار الا الادى

قازاقستاندىقتار بۇدان بىلاي تانىمال مەسسەدجەرلەر ارقىلى بىرقاتار قاجەتتى انىقتاما الا الادى. بۇل تۋرالى «ۇلتتىق اقپاراتتىق تەحنولوگيالار» اق باسقارما توراعاسى اسەت تۇرىسوۆ ءمالىم ەتتى.

«كورىپ وتىرعانىمىزداي, الەۋمەتتىك جەلىلەر كۇندەلىكتى ءومىرىمىزدىڭ ءبىر بولىگىنە اينالىپ كەتتى. مىنە, وسى جايدى ەسكەرە وتىرىپ, مەملەكەتتىك قىزمەت الۋدىڭ قوسىمشا ىڭعايلى سەرۆيستەرىن ىسكە قوسۋدى ءجون دەپ شەشتىك. قىركۇيەكتە سىناق تۇرىندە چات-بوتتاردى ىسكە قوسقان ەدىك. قازىر پايدالانۋشىلاردىڭ كۇننەن-كۇنگە ارتىپ كەلە جاتقانىن باقىلاپ وتىرمىز. بۇگىنگى كۇنى Telegram-بوت ارقىلى 20 مەملەكەتتىك قىزمەتتى الۋعا بولادى. سول سەكىلدى, «ۆكونتاكتە» ارقىلى 19, «Facebook» ارقىلى 15 مەملەكەتتىك قىزمەتتىڭ ءتۇرى قولجەتىمدى. جازىلعان پىكىرلەردى ەسكەرە وتىرىپ, قىزمەت ءتۇرىن ارتتىرعان ابزال دەپ وتىرمىز», — دەدى اسەت تۇرىسوۆ ەلورداداعى «تسيفرلىق كۇزدىڭ» تانىستىرىلۋىندا.

وسىدان كەيىن ءا.تۇرىسوۆ چات-بوتتاردىڭ قالاي جۇمىس ىستەيتىنىن ءتۇسىندىرىپ بەردى.

ايتۋىنشا, الدىمەن الەۋمەتتىك جەلىنى پايدالانۋشى ءتيىستى حابارلامانى جىبەرەدى. ال اقىلدى جۇيە ادامداردىڭ قاتىسۋىنسىز وپەراتورلارعا كەلگەن قىزمەتتەردى تەڭ ءبولىپ بەرەدى. ياعني, ءتيىستى ءنومىر الىپ, اتقارۋشى اۆتوماتتى تۇردە تاعايىندالادى. مۇنداي جۇيە جۇمىس بارىسىن ءتيىمدى باسقارۋعا مۇمكىندىك بەرەدى. پايدالانۋشىعا سۇراۋىن ورىنداۋشىلاردىڭ اتى-ءجونى مەن بايلانىس ءنومىرى تۋرالى حابارلاما تۇسەدى. وسىلايشا, پايدالانۋشى ۆيرتۋالدى كەڭەسشىمەن سويلەسە وتىرىپ, بەلگىلى ءبىر مەملەكەتتىك قىزمەتتى الا الادى.

ەسكە سالا كەتسەك, بۇگىنگى «تسيفرلىق كۇزدە» قر تسيفرلىق دامۋ, يننوۆاتسيالار جانە اەروعارىش ءوندىرىسى ءمينيسترى اسقار جۇماعاليەۆ eGov-تىڭ جاڭارتىلعان ءموبيلدى قوسىمشاسى ىسكە قوسىلاتىنىن ءمالىم ەتكەن ەدى.
سونىمەن بىرگە, «ازاماتتارعا ارنالعان ۇكىمەت» مەملەكەتتىك كورپوراتسيا باسقارماسىنىڭ توراعاسى اسەمگۇل بالتاشەۆا مەكەنجاي انىقتاماسىنان بولەك تاعى 28 انىقتامانىڭ دا جويىلاتىنىن جاريالادى.

دەرەككوز: https://www.inform.kz/kz/kazakstandyktar-messedzherler-arkyly-anyktamalar-ala-alady_a3571471