Қытайлық блогер Тао Минсю Қазақстан президентінің атынан ІІ дәрежелі «Достық» орденімен марапатталды. Жоғары мемлекеттік награданы премьер-министрдің орынбасары – мәдениет және ақпарат министрі Аида Балаева табыстады. Бұл туралы Qandastar.kz сайты Мәдениет және ақпарат министрлігіне сілтеме жасап жария етті.
Министрліктің мәліметінше, марапат блогердің Қытай медиакеңістігінде Қазақстанды танытуға, оның мәдени мұрасы мен туристік әлеуетін насихаттауға, сондай-ақ екі ел арасындағы гуманитарлық байланыстарды нығайтуға қосқан үлесі үшін берілген.
Салтанатты рәсім барысында Аида Балаева Тао Минсюдің Қазақстан мен Қытай халықтары арасындағы достықты дамытудағы еңбегін ерекше атап өтті.
Тао Минсю, әлеуметтік желілерде Тао Тао есімімен танымал, Қазақстанға алғаш рет 2024 жылдың қыркүйегінде келген. Содан бері ол Астана мен Алматы қалаларында, сондай-ақ Ақмола, Шығыс Қазақстан, Алматы және Маңғыстау облыстарында болып, жалпы қамтылымы 1 миллиардтан асатын 100-ден астам материал жариялаған.
2025 жылдың мамыр айында блогерге «Қазақстан туризмінің елшісі» мәртебесі берілген. Соңғы сапары барысында ол Алматы – Ақтау – Түркістан бағытымен саяхаттап, Амал және Наурыз мерекелеріне арналған іс-шараларға қатысты.
