بوكسشىلارىمىز بەن بالۋاندارىمىز جەرگە قاراتىپ بولدى – ءجۇرسىن ەرمان

فوتو: اشىق دەرەككوز

اقىن, تەلەجۇرگىزۋشى ءجۇرسىن ەرمان دايارلىعىنا ميلليونداعان قارجى ءبولىنىپ, بىراق نەبارى ءبىر التىن مەدالمەن ورالعان سپورتشىلار جايلى ويىن ايتتى, – دەپ حابارلايدى qandastar.kz 1bol.kz-كە سىلتەمە جاساپ.

تانىمال اقىن EL ARNA تەلەارناسىنا بەرگەن سۇحباتىندا پاريج وليمپياداسىن باسىنان اياعىنا دەيىن قاراپ, كوڭىلى قۇلازىعانىن جەتكىزدى.

«باسىنان باستاپ جابىلۋ سالتاناتىنا دەيىن كوردىم. قازاقستاننىڭ سپورتشىلارىنا سوڭعى جاعىندا بىردەڭە جەتىسپەي قالىپ جاتادى. سۋ سپورتىنا دەيىن قارادىم, تايانا بەرگەندە جەتپەي قالادى. جىگەرىمىزدى ابدەن قۇم قىلىپ ءبىتتى. نە دەيمىز, باق سولاي بوپ تۇر ما, باپ سولاي بوپ تۇر ما – بىلمەيمىن. ايتپەسە لوندون وليمپياداسىندا جەتى التىن الىپ ەدىك, ونىڭ دا داۋرەنى ءوتىپ كەتىپتى. بوكسشىلارىمىز دا, بالۋاندارىمىز دا ابدەن جەرگە قاراتىپ بولدى. افينا وليمپياداسىندا دا ءبىتتى-اۋ دەگەندە, باحتيار ارتاەۆتىڭ ارقاسىندا جالعىز التىندى ارەڭ الىپ ەدىك. وعان دا زار بولىپ قالدىق. ەلدوس سمەتوۆ بولماسا, ەلدىڭ ەڭسەسى تىپتەن ءتۇسىپ كەتۋشى ەدى. ءبىزدىڭ سپورت كوممەنتاتورلارى قىزىق, «انانى الامىز, مىنانى الامىز» دەپ جەلىكتىرىپ قويادى. بىراق سوڭىندا ەشتەڭە بۇيىرماي قالادى», – دەدى ءجۇرسىن ەرمان.