Қазақстанда мемлекеттік туды пайдалану ережелеріне қатысты жаңа өзгерістер енгізілуі мүмкін. Бұл туралы Qandastar.kz сайты Stan.kz ақпарат агенттігіне сілтеп хабарлайды.
Мәдениет және ақпарат министрлігі мемлекеттік рәміздерді қолдану тәртібін жаңартатын заң жобасын әзірледі. Жаңа нормаларға сәйкес, азаматтарға көк байрақты балконға ілуге және көлікте алып жүруге рұқсат беру қарастырылып отыр.
Министрлік өкілдерінің айтуынша, туды киім, төсек жабдығы немесе жарнамалық мақсатта қолдануға тыйым сақталады. Сонымен қатар, мемлекеттік ту жерге, суға немесе еденге тимеуі тиіс.
Жобаға сәйкес, балконға орнатылған ту жерден кемінде 3 метр биіктікте орналасуы қажет және терезе немесе балкон сыртына жай ғана жабыстырып қоюға болмайды. Туды көлденеңінен шамамен 45 градус бұрышпен қою талап етіледі, ал түнгі уақытта арнайы жарықтандыру міндетті емес.
Мәдениет және ақпарат министрлігі өкілі Әсел Құлмағанбет рәміздерді халыққа қолжетімді ету мақсатында осындай өзгерістер енгізіліп жатқанын атап өтті.
Айта кетейік, туды дұрыс пайдаланбаған жағдайда 200 мың теңгеге дейін айыппұл салынуы мүмкін, ал мемлекеттік рәміздерге құрметсіздік таныту қылмыстық жауапкершілікке әкеледі.