جاڭالىقتار
وتباسىنداعى تيراندار قولىنان تاعى 69 ايەل مەن جەتى بالا قازا تاپتى
قازاقستانداعى بالا قۇقىقتارى جونىندەگى ۋاكىل دينارا زاكيەۆا بىلتىر ەلدە تۇرمىستىق زورلىق-زومبىلىقتان 69 ايەل مەن جەتى بالا قايتىس بولعانىن مالىمدەدى.
بالالار مەن ايەلدەردىڭ قۇقىقتارىن تۇرمىستىق زورلىق-زومبىلىقتان قورعاۋ تۋرالى زاڭ جوباسىنىڭ تۇساۋكەسەرى كەزىندە زاكيەۆا تۇرمىستىق زورلىق-زومبىلىق پەن بالالارعا قاتىستى جاسالعان قىلمىستار بۇگىنگى تاڭدا قوعامنىڭ ەڭ وزەكتى ماسەلەلەرىنىڭ ءبىرى ەكەنىن ايتتى.
«وتكەن جىلى تۇرمىستىق زورلىق-زومبىلىققا قاتىستى 99 مىڭ ءوتىنىش كەلىپ ءتۇستى. بالالارعا قارسى 24 52 قىلمىس جاسالدى, 69 ايەل مەن جەتى بالا تۇرمىستىق زورلىق — زومبىلىقتان قازا تاپتى», — دەدى ول.
ءماجىلىس دەپۋتاتى جۇلدىز سۇلەيمەنوۆا زاڭ جوباسىنىڭ جاڭالىعىن ايتا كەلە, زاڭ نورمالارىمەن 200 اەك-كە دەيىن ايىپپۇل سالۋ, قوعامدىق جۇمىستارعا 200 ساعاتقا دەيىن تارتۋ نەمەسە 50 تاۋلىككە دەيىن قاماۋعا الۋ تۇرىندەگى جازامەن دەنساۋلىققا جەڭىل زيان كەلتىرگەنى ءۇشىن قىلمىستىق جاۋاپكەرشىلىك قالپىنا كەلتىرىلىپ جاتقانىن اتاپ ءوتتى.
«ۇرىپ-سوعۋ ءۇشىن 80 اەك-كە دەيىن ايىپپۇل تۇرىندە نەمەسە قوعامدىق جۇمىستارعا 80 ساعاتقا دەيىن تارتۋ ارقىلى جازا كوزدەلەدى», — دەپ اتاپ ءوتتى دەپۋتات.
سونداي-اق, جاڭا زاڭنىڭ نورمالارىمەن كامەلەتكە تولماعان ادامدى ازاپتاعانى, دەنساۋلىعىنا اۋىر جانە ورتاشا زيان كەلتىرگەنى ءۇشىن قىلمىستىق جازانى قاتاڭداتۋ جوسپارلانۋدا.
«جالپى, بۇل ەلىمىزدىڭ بارلىق ازاماتتارىنىڭ دەنساۋلىعىنا قاتىستى. زاڭ جوباسىنىڭ باستى ماقساتى – دەنساۋلىققا اۋىر زيان كەلتىرگەنى ءۇشىن قىلمىستىق جاۋاپكەرشىلىكتى 3 جىلدان 5 جىلعا دەيىن قاتاڭداتۋ», — دەدى سۇلەيمەنوۆا.
سونداي-اق, جاڭا زاڭدا دەپۋتاتتار جاس بالانى ولتىرگەنى نەمەسە پەدوفيليا ءۇشىن ءومىر بويىنا باس بوستاندىعىنان ايىرۋدى جوسپارلاپ وتىر.
