شەرزات ءىسى: ايىپتالۋشى جالعان ايعاق بەرگەنىن مويىندادى

تالعار اۋدانىندا قارالى جاعدايعا سەبەپ بولعان اتىشۋلى ءىس بويىنشا ءوتىپ جاتقان سوت پروتسەسىندە ايىپتالۋشى ازامات توقتاۋباەۆ بۇرىنعى بەرگەن جاۋابىنىڭ جالعان بولعانىن مالىمدەدى. بۇل تۋرالى سوت وتىرىسى بارىسىندا بەلگىلى بولدى, دەپ حابارلايدى qandastar.kz cايتى Skifnews.kz اقپاراتتىق پورتالىنا سىلتەمە جاساپ.

سوتتا «قاماجاي» دۇكەنى الدىنداعى بەينەباقىلاۋ جازباسى كورسەتىلىپ, وقيعانىڭ بارىسى قايتا تالداندى. پروكۋرور توقتاۋباەۆتان بۇعان دەيىن دارحان اسكەنتايعا قاتىستى ايتقان سوزدەرىنىڭ نە سەبەپتى وزگەرگەنىن سۇرادى.

ايىپتالۋشىنىڭ ايتۋىنشا, ول بۇعان دەيىنگى جاۋاپتارىندا اسكەنتايعا اشۋلانىپ, وعان قاتىستى تەرىس پىكىر بىلدىرگەن.

«دارحان بۇل ىسكە مۇلدە قاتىسقان جوق. قولىندا قارۋ بولماعان, ەشكىمگە شابۋىل جاساعانىن دا كورمەدىم. وتىرىك ايعاق بەرىپ قويدىم, ەندى وكىنەمىن», – دەدى توقتاۋباەۆ.

سونىمەن قاتار, ول وقيعا ورنىندا بولعان مارقۇم شەرزاتتىڭ دوستارىن دارحاننىڭ تانىستارى دەپ شاتاستىرعانىن ايتتى.

سوت پروتسەسى ءالى دە جالعاسىپ جاتىر. بۇل مالىمەتتەر ءىس بويىنشا كىنالىلەردىڭ كىم ەكەنىن ناقتىلاۋعا اسەر ەتۋى مۇمكىن.