سۋ تاسقىنىنان زارداپ شەككەن وبلىس ورتالىعىنىڭ العاشقى تۇرعىندارىنا پاتەرلەر بەرىلدى

بۇگىن كوكشەتاۋدا سۋ باسۋ ايماعىندا قالعان زارداپ شەككەن تۇرعىندارعا پاتەر كىلتتەرى تاپسىرىلدى.

پاتەر كىلتتەرىن اقمولا وبلىسىنىڭ اكىمى مارات احمەتجانوۆ تابىس ەتتى, ول مەملەكەت زالالدى ازايتۋ ءۇشىن بارلىق شارالاردى قولدانىپ جاتقانىن اتاپ ءوتتى.

«مەملەكەت باسشىسىنىڭ تاپسىرماسى بويىنشا اقمولا وبلىسىندا ازاماتتاردىڭ قاۋىپسىزدىگىن قامتاماسىز ەتۋ جانە ولاردىڭ قاجەتتىلىكتەرىن شەشۋ بويىنشا ۇلكەن جۇمىس جۇرگىزىلۋدە. بۇگىن ءسىز پاتەر العان العاشقى ادام بولدىڭىز. وتباسىلارىڭىزدا ءبارى جاقسى بولىپ, قيىنشىلىقتار ارتتا قالسىن», — دەدى مارات احمەتجانوۆ.

مەملەكەتتىك قوردان العاشقى تۇرعىن ءۇي الۋشىلار قاپاروۆتار جانە نيكۋليندەر كوپبالالى وتباسىلارى بولدى. الىنعان پاتەرلەردى تۇرعىندار وزدەرى تاڭدادى. پاتەردە تۇرۋ ءۇشىن قاجەت نارسەنىڭ ءبارى بار.

«پرەزيدەنتكە ءبىزدىڭ ماسەلەلەرىمىزدى تەز شەشكەنى ءۇشىن العىس ايتامىز.  ءبىزدىڭ وتباسىمىز ءۇشىن بۇل ۇلكەن قۋانىش, بالالار ريزا, بارلىعىنا ۇلكەن راحمەت.  ءبىز ءوز تاراپىمىزدان وسى ۇيدە تەك قۋانىشتى ساتتەردىڭ بولۋىنا تىرىسامىز», — دەدى ساۋلە قاپاروۆا.

مەملەكەت باسشىسىنىڭ تاپسىرماسى بويىنشا اقمولا وبلىسىندا زارداپ شەككەندەرگە بارلىق قاجەتتى قولداۋ كورسەتىلەتىنىن جانە ازاماتتاردىڭ مۇلكىن قالپىنا كەلتىرۋ بويىنشا بارلىق شارالار قولدانىلىپ جاتقانىن اتاپ وتكەن ءجون.

وڭىردە شىعىنداردى وتەۋ جانە جويۋ جونىندەگى جۇمىس تۇرعىن ءۇي قاتىناستارى تۋرالى قولدانىستاعى زاڭناما شەڭبەرىندە جالعاستىرىلاتىن بولادى. كەشە وبلىس ورتالىعىنىڭ 174 وتباسى
65 ملن. تەڭگەدەن استام سوماعا بىرجولعى تولەم الدى.  سونداي-اق, ماتەريالدىق شىعىنداردى باعالاۋ جانە وتەۋ جونىندەگى كوميسسيا
12 وتباسىنا 8 ملن. تەڭگەدەن استام كولەمدە ماتەريالدىق زالالدى وتەۋ تۋرالى شەشىم شىعاردى.

سونىمەن قاتار, ارنايى كوميسسيا قازىرگى ۋاقىتتا تۇرعىن ءۇيدىڭ ودان ءارى تۇرۋعا جارامدىلىعىن انىقتاۋ بويىنشا تەحنيكالىق تەكسەرۋلەر جۇرگىزۋدە.