ساموكات تىزگىندەۋشىلەر جۇرگىزۋشى مە, الدە جۇرگىنشى مە

ەلەكتر ساموكات, سيگۆەي, گيروسكۋتەر سياقتى قوزعالىس قۇرالىن پايدالانۋشىلار زاڭدا جاياۋ جۇرگىنشىلەرگە تەڭەستىرىلگەن.

قر ىشكى ىستەر مينيسترلىگىنە قاراستى اكىمشىلىك پوليتسيا كوميتەتىنىڭ ءباسپاسوز حاتشىسى يرينا لۋكيانينا Facebook پاراقشاسىندا ەلەكتر ساموكاتتاردىڭ جاياۋ جۇرگىنشىلەرگە تەڭەستىرىلگەنىن ايتتى, دەپ حابارلايدى قازاقپارات ءتىلشىسى.

ءباسپاسوز حاتشىسىنىڭ ايتۋىنشا, سيگۆەي, گيروسكۋتەر سياقتى قوزعالىس قۇرالىن پايدالانۋشىلار زاڭدا جاياۋ جۇرگىنشىلەرگە تەڭەستىرىلگەن.

ولار تىزگىندەگەن قۇرال كولىككە جاتپايدى
سوندىقتان, ونى پايدالانۋشىلار جاياۋ جۇرگىنشى رەتىندەگى قۇقىقتارىن ءبىلىپ, جول ەرەجەسىن ساقتاۋعا مىندەتتى. ياعني, ارنايى تروتۋارمەن, جاياۋ جۇرگىنشى جولىمەن ءجۇرۋى قاجەت. ول جوق بولعان جاعدايدا جولدىڭ جيەگىمەن قوزعالۋعا مىندەتتى», — دەپ جازدى يرينا لۋكيانينا.

ول, سونداي-اق, اتالمىش تالاپتى ساقتاماعان ساموكات يەلەرى ەكى ايلىق ەسەپتىك كورسەتكىش كولەمىندە ايىپپۇل ارقالاۋى مۇمكىن ەكەنىن ايتادى.

«اكىمشىلىك قۇقىق بۇزۋشىلىق كودەكسىنىڭ 615-بابىنىڭ 1-بولىگىنە سايكەس, جاياۋ جۇرگىنشىلەر (ۆەلوسيپەد جانە موپەد جۇرگىزۋشىلەر, وسى ساناتقا تەڭەستىرىلگەن وزگە دە جول قوزعالىسىنا قاتىسۋشىلار) جول قوزعالىسىنىڭ ەرەجەلەرىن ساقتاماعانى ءۇشىن 2 اەك كولەمىندە ايىپپۇل ارقالايدى», — دەدى يرينا لۋكيانينا.

اكىمشىلىك پوليتسيا كوميتەتىنىڭ وكىلى موپەدكە تەڭەستىرىلگەن قوزعالىس قۇرالدارىن 16-عا تولعان تۇلعالار عانا پايدالانا الاتىنىن ەسكەرتەدى.

«بۇل ساناتتاعى جول قوزعالىسىنا قاتىسۋشىلار جول جيەگىمەن قوزعالا الادى. تەك ول ءۇشىن وزگەلەرگە كەدەرگى كەلتىرمەۋى كەرەك. ەگەر كەدەرگى كەلتىرەتىندەي جاعداي بولسا, قوزعالىس قۇرالىنان ءتۇسىپ, جاياۋ ءجۇرۋى شارت. جول قوزعالىسىنىڭ 24-بولىمىندە بۇل تۋرالى تولىق ايتىلعان. موپەد پەن ەلەكتر ساموكات تىزگىندەۋشىلەر ۆەلوسيپەد جولاعىمەن جۇرۋگە مىندەتتى. ول جوق بولعان جاعدايدا نەگىزگى جولدىڭ وڭ جاق جيەگىمەن, مارشرۋتتىق كولىكتەرگە ارنالعان جولاقتارمەن ءجۇرۋى ءتيىس», — دەلىنگەن جازبادا.

كوميتەت وكىلىنىڭ جازباسىنا سۇيەنسەك, ەلەكتر ساموكاتپەن ءجۇرۋ كەزىندە كەلەسى ارەكەتتەرگە تىيىم سالىنادى:

• تىزگىندى ەكى قولمەن ۇستاماي ءجۇرۋ;
• وزگەلەردى مىنگەستىرۋ;
• ۇزىندىعى 15 سانتيمەتردەن اساتىن, وزگەلەردىڭ قوزعالىسىنا كەدەرگى كەلتىرەتىن پىشىندەگى جۇك تاسىمالداۋ;
• ۆەلوسيپەد جولى بولا تۇرا, نەگىزگى جولعا ءتۇسۋ;
• ترامۆاي قوزعالىسى بار نەمەسە ءبىر باعىتتا بىرنەشە جولاعى بار جولداردا سولعا نەمەسە كەرى بۇرىلۋ;
• تىركەمە جالعاۋ.

«ەگەر اتالمىش ساناتتاعى جولاۋشى جول ەرەجەسىنەن تىس ارەكەتتەرى سالدارىنان وزگەلەردىڭ دەنساۋلىعىنا قىلمىستىق سيپاتى جوق زارداپ تيگىزسە, ايىپپۇل مولشەرى ەكى ايلىق ەسەپتىك كورسەتكىشتەن 10 ايلىق ەسەپتىك كورسەتكىشكە دەيىن وسەدى. قولدانىستاعى زاڭنامادا اتالمىش ساناتتاعى جول قوزعالىسىنا قاتىسۋشىلاردىڭ ارنايى كيىمدەرمەن جاراقتالۋىنا قاتىستى رەگلامەنت جوق», — دەپ جازدى يرينا لۋكيانينا.