Алматыда 28 жастағы Рамазан Исхаровтың соты басталды. Тергеу мәліметтері бойынша, ол бірнеше бойжеткенге «үйленемін» деп уәде беріп, атына миллиондаған несие рәсімдеген. Бұл әрекеттен кемінде үш қыз бен өзінің досы зардап шеккен. Бір «қалыңдық» пәтерінен айырылып қала жаздаса, енді бірі соққыға жығылған, деп жазды qandastar.kz
2022 жылдан бастап Рамазан Исхаров бірнеше әйелді жүйелі түрде алдаған. Ол өзін полиция қызметкерімін деп таныстырып, үйленемін деп уәде берген. Кейіннен олардың атында несие алып, үлкен қаржылық шығынға ұшыратқан. Жалпы, төрт зардап шеккеннің шығыны шамамен 80 миллион теңгені құрайды.
Зардап шегушінің айғағы
21 қазан күні сотта сөз сөйлеген Т. К. есімді әйелдің айтуынша, олар Исхаровпен фотосалонда танысқан. Бірінші кездесуінде ол танысының телефон нөмірін сұраған, ал содан кейін қарым-қатынас басталған. Бірақ таныстықтан кейінгі аптада оның өмірі қаржылық қиындыққа айналған.
Т. өзінің ешқашан несие алмағанын, алайда Исхаров телефонды 700 мың теңгеге кредитке алуға көндіргенін айтады. Кейін одан әрі киім-кешек, микрокредиттер мен банктерден алынған басқа да қарыздар пайда болған.
Исхаров оның банк картасын да пайдаланып, оның 750 АҚШ долларын ұрлап, 1 миллион 400 мың теңгеге несие рәсімдеген.
Жалпы, Т.-ның атына рәсімделген қарыз көлемі 11 миллион 980 мың теңгеге жеткен.
Пәтерді кепілге қою және алдау
Т. Исхаровтың барлық қарызды төлейміз деп уәде беріп, кейін қарыздарды өндірушілер қоңырау шала бастағанда «бәрі шешіледі» деп айтқанын жеткізді.
Ең сорақысы, 2023 жылдың қарашасында Исхаров Т.-ны нотариуспен бірге пәтерін кепілге қоюға мәжбүрлеген. Кейін ол 6,5 миллион теңге алып, жоғалып кеткен.
Бірақ бір жылдан соң Исхаровтың анасы 7,5 миллион теңге қайтарып, пәтер кепілден босатылған.
Қорқыту мен жасырыну
Т. сотта Исхаровтың өзін полиция қызметкері ретінде таныстырып, полициядағы туыстары арқылы дегенін жасайтынын айтқан. Ол бірнеше рет полицияға арыз жазғысы келгенімен, арыз қабылданбаған.
Тергеу органдарымен кездескенде Исхаров ақшаны қайтаруға уәде берген, бірақ ештеңе төлемеген. Қарыз бен қысымнан депрессияға түскен Т. тіпті өміріне қол жұмсамақ болғанын да сотта жасырмады.
Айыпталушының жауабы
Сотта Исхаров өз кінәсін толық мойындағанын, тараптар бітімге келсе, зиянды өтеуге дайын екенін жеткізді. Ол барлық несиені Т.-ның бастамасымен алғанын айтты.
Исхаровтың айтуынша, ол тек стажер ретінде ғана полицияда жұмыс істеген, мекеменің толыққанды қызметкері болмаған. Бұл әрекеті үшін өкінетінін де айтты.
Сот процессі әлі жалғасып жатыр.
