17 шілдеде Балқаш көлінің жағалауында Металлург күніне арналған **Metallurg Fest** мерекелік фестивалі өтті. Ауқымды гала-концертке қала тұрғындары мен қонақтары, өндіріс қызметкерлері, сала ардагерлері және олардың отбасы мүшелері жиналды. Бұл туралы Qandastar.kz сайты хабарлады.
Металлург күні Балқаш үшін ерекше маңызға ие. Өйткені қаланың қалыптасуы мен дамуы металлургия саласымен тығыз байланысты. Мерекелік шара өндіріс саласында еңбек етіп жүрген мамандарға құрмет көрсетіп, олардың ел өнеркәсібі мен өңірдің өркендеуіне қосқан үлесін дәріптеуге арналды.
Фестиваль аясында қонақтарға концерттік бағдарлама, интерактивті алаңдар, балаларға арналған ойын аймақтары мен «Қазақмыс» тарихы мен металлургтердің еңбегіне арналған бірлескен арт-панно жасау алаңы ұсынылды.
Кештің музыкалық бағдарламасын **Timur Teams** тобы мен әнші **IL’HAN** ашты. Көрермендер Балқаш мыс балқыту зауытының қызметкерлері Ерсұлтан Сәкенов пен Әділжан Бисенбаевтан құралған **ERS & Adilzhanym** дуэтін ерекше ықыласпен қарсы алды. Металлургтердің өмірі мен еңбегі туралы әндер көпшіліктің ыстық ықыласына бөленді.
Кештің ерекше көріністерінің бірі **CrossFire** тобы ұсынған «Салтанат» жарық шоуы болды. Қойылымда ұлттық нақыштағы бейнелер, заманауи хореография және жарық эффектілері үйлесім тапты.
Сахнада Болат Құсайынов, Жанар Дұғалова және аты аңызға айналған «Ялла» вокалды-аспаптық ансамблі өнер көрсетті. Кештің басты музыкалық оқиғасы «Ирина Кайратовна» тобының концерті болды. Танымал ұжымның өнер көрсетуі Балқаш көлінің жағалауын ашық аспан астындағы үлкен би алаңына айналдырды.
Мерекелік кеш барысында түрлі интерактивті бағдарламалар ұйымдастырылып, жүргізушілер Марат Оралғазин мен Еркебұлан Мырзабек қатысушыларды қоршаған ортаны таза ұстауға және табиғатты аялауға шақырды.
Мереке металлургтердің құрметіне арналған жарқын отшашумен аяқталды. Концерт кезінде қоғамдық тәртіпті құқық қорғау органдарының қызметкерлері қамтамасыз етсе, шарадан кейін коммуналдық қызмет мамандары мен еріктілер жағалау аумағын тазалау жұмыстарын жүргізді.
Биылғы Металлург күні де Балқаш жұртшылығын ортақ еңбек мерекесіне біріктіріп, қаланың өткені мен бүгіні металлургия саласымен тығыз байланысты екенін тағы бір мәрте айқын көрсетті.
