Қазақстанда сотталғандарды ұстауға кететін шығын көлемі белгілі болды, деп хабарлайды qandastar.kz порталы.
Қазақстанда бір сотталған адамды ұстауға жыл сайын шамамен 3 миллион теңге жұмсалады.
Бұл туралы Бас прокурор Берік Асылов мәлімдеді.
Оның айтуынша, қазіргі таңда елдегі 30 мыңға жуық сотталғанның әр үшіншісі бұрын да бас бостандығынан айырылған.
Бұл жағдай қылмыстың қайталану деңгейі әлі де жоғары екенін көрсетеді.
Осыған байланысты Қазақстанның Бас прокуратурасы сотталғандарды қоғамға қайта бейімдеу шараларын күшейтуді ұсынды.
Ведомствоның пікірінше, ресоциализация жүйесін жетілдіру арқылы қайталама құқық бұзушылықтың алдын алуға болады.
Жаңа бастама аясында тиісті заңнамаға өзгерістер енгізу қарастырылуда.
Ұсынысқа сәйкес, түрмеден босап шыққан азаматтарды қоғамға бейімдеу жұмыстары жергілікті атқарушы органдардың құзыретіне берілмек.
Ал бұл бағыттағы жалпы үйлестіру функциясы Еңбек және халықты әлеуметтік қорғау министрлігіне жүктелуі мүмкін.
Мамандар бұл шаралар сотталғандарды қайта әлеуметтендіруді жүйелі түрде жүргізуге және олардың қоғамға сәтті оралуына мүмкіндік береді деп есептейді.
