Қазақстандықтар ақшасының көп бөлігін азық-түлікке жұмсайды

Қазақстандықтардың ақшасының көп бөлігін азық-түлікке жұмсайтын болып шықты – тоқсанына 142 169 теңге, азық-түлікке жатпайтын тауарларға – 66 268 теңге, ақылы қызметтерге – 48 250 теңге жаратқан.

Ұлттық статистика бюросының ақпараты бойынша, 2023 жылдың IV тоқсанында бір қазақстандықтың шығыны 277 202 теңге немесе айына 92,4 мың теңге болған. Бұл өткен жылғы осы кезеңмен салыстырғанда 12,3 пайызға жоғары

Азық-түлік пен алкогольсіз сусындардарға бір қазақстандық 129 953 теңге төлейді екен, сырттан тамақтануға – 6070 теңге, алкогольдік сусындарға – 1766 теңге, темекі өнімдеріне – 3970 теңге төлейді.

Орташа алғанда, еліміздің бір тұрғыны тоқсанына 14 819 теңгені несие мен қарызды өтеуге, 5362 теңгені алиментке, 334 теңгені салық пен басқа да төлемдерге жаратады.

Шығыны ең көп елорда тұрғындары болып шықты. Бір астаналық тоқсан ішінде 366 345 теңге жұмсаған, яғни бұл айына – 122 115 теңге. Одан кейінгі орында алматылықтар мен Қарағанды облысының тұрғындары тұр.