رەسەيدە سۋ تاسقىنىنا قاتىستى احۋال كۇردەلەنىپ بارادى

اسىرەسە قورعان وبلىسىندا. وڭىردەگى وزەندەردە سۋ دەڭگەيى كوتەرىلىپ, تاعى ونداعان ەلدى مەكەندى سۋ باسۋ قاۋىپى بار. رەسەيدىڭ قورعان وبلىسىندا 62 ەلدى مەكەن, 4 مىڭنان اسا ءۇي مەن 600 ساياجاي ۋچاسكەسىن سۋ باسۋى مۇمكىن. وسى ۋاقىتقا دەيىن وڭىردە 21 ءۇي مەن 100-گە جۋىق جەر ۋچاسكەگە سۋ جايىلىپ, 7 تاسجولدىڭ كەي تۇستارىن شايىپ كەتكەن. قازىر قاۋىپتى ايماقتاردان تۇرعىنداردى ەۆاكۋاتسيالاۋ جۇرگىزىلىپ جاتىر. قۇتقارۋشىلار وسى ۋاقىتقا دەيىن 600-دەن اسا ادامدى كوشىردى. ولاردىڭ 100-دەن استامى ۋاقىتشا ورنالاستىرۋ ورتالىقتارىنا جايعاسسا, 500-ءى تۋعان-تۋىستارىنىڭ ءۇيىن پانالاعان. قارعىن سۋدىڭ مولايۋىنا بايلانىستى بيلىك وكىلدەرى حالىقتى شۇعىل تۇردە كوشۋگە شاقىرىپ جاتىر.

بيلىك وكىلدەرىنىڭ ايتۋىنشا, الداعى ۋاقىتتا ايماقتاعى احۋال كۇردەلەنە تۇسەدى. سەبەبى توبىل, ءۇي, يسەت پەن مياسس وزەندەرىندە سۋ دەڭگەيى ساعات سايىن كوتەرىلىپ جاتىر. روسگيدرومەت بولجامى بويىنشا توبىل وزەنىنىڭ دەڭگەيى كوپ ۇزاماي 11 مەتردەن اسادى. قازىردىڭ وزىندە زۆەرينوگولوۆسك اۋدانىندا ول 735 سانتيمەترگە جەتكەن. ءبىر تاۋلىك بۇرىن عانا ءدال وسى ەلدى مەكەندە توبىل وزەنىنىڭ دەڭگەيى 660 سانتيمەتر شاماسىندا بولاتىن. ال ءبىزدىڭ ەلدىڭ شەكاراسىنان 12 شاقىرىم جەردە ورنالاسقان ۆۆەدەنسكوە بەكەتىندە سۋ 10 مەتر 75 سانتيمەتردى كورسەتىپ تۇر.

ۆلاديمير ياكۋشەۆ, رف پرەزيدەنتىنىڭ ۋرال فەدەرالدى وكگرۋگىندەگى وكىلەتتى وكىلى:
-توبىل وزەنىندەگى سۋ بۇرىن-سوڭدى بولماعان دەڭگەيگە كوتەرىلەدى دەگەن قاۋىپ بار. وسىعان بايلانىستى ءتيىستى دايىندىق جۇمىستارى جىلدام ءارى ءتيىمدى جۇزەگە اسىرىلۋى ءتيىس. ەڭ الدىمەن قارعىن سۋ بويىنشا حالىقتى حابارداپ ەتۋى كەرەك. تۇرعىندار مۇنى ەلەۋسىز قالدىرماۋى ءتيىس. قازىرگى ۋاقىتتا ايماقتا بوگەت سالۋ جۇمىستارى قىزۋ ءجۇرىپ جاتىر. سونىمەن قاتار, قوسىمشا كۇشتەر تارتىلۋدا. بۇگىن اپات اۋداندارىنا توتەنشە جاعداي مينيسترلىگىنىڭ اەروموبيلدى توبى اتتاندى. 100-دەن اسا مامان ايماقتاعى تاسقىننىڭ الدىن الۋعا كومەكتەسەدى. تاسقىنعا توسقاۋىل قويۋ ءۇشىن وڭىردەگى گيدروتەحنيكالىق نىساندار قورعانىس ۇيىندىلەرىمەن بەكىتىلىپ جاتىر. بۇدان بولەك, ينەرتتى ماتەريالدار, قاپشىقتار دايىندالۋدا. الاپات تاسقىننان قورعان قالاسى كوپ ۇزاماي اۋىز سۋسىز قالۋى مۇمكىن. سەبەبى شاھاردى تىرشىلىك نارىمەن قامتاماسىز ەتەتىن نىساندارعا سۋ باسۋ قاۋپى تونگەن. وسىعان بايلانىستى بيلىك وكىلدەرى حالىققا ەسكەرتۋ جاساپ, تەز ارادا تۇرمىسقا قاجەتتى سۋدىڭ ءبىر ايلىق قورىن جيناپ الۋعا شاقىرىپ جاتىر.

ۆلاديمير وۆسياننيكوۆ, «ۆودنىي سويۋز» كومپانياسىنىڭ باس ديرەكتورى:
-تاسقىن سۋعا قاتىستى جاڭا اقپار بويىنشا حالىقتى تازا سۋمەن قامتاماسىز ەتەتىن نىساندارعا قاۋىپ ءتونىپ تۇر. وسىعان بايلانىستى قورعان تۇرعىندارى شارۋاشىلىق-اۋىزسۋ ماقساتىندا قولدانىلاتىن سۋدىڭ ءبىر ايلىق قورىن جيناپ الۋى كەرەك. قازىرگى ۋاقىتتا قالا سۋمەن قالىپتى جاعدايدا قامتاماسىز ەتىلۋدە. ياعني حالىقتىڭ ساپالى سۋ قورىن جيناپ الۋىنا ءالى مۇمكىندىك بار. بىراق ۋاقىت وتە شەكتەۋلى. ۇرەيى قاشقان جۇرت قازىر جاپپاي قالاداعى دۇكەندەرگە اعىلىپ, سۋ ساتىپ الىپ جاتىر. ۇزىنسونار كەزەك قالىپتاسقان. سونىڭ سالدارىنان اۋىزسۋ باعاسى كۇرت قىمباتتاپ كەتكەن.