RESEIDE SÝ TASQYNYNA QATYSTY AHÝAL KÚRDELENIP BARADY

Ásirese Qorǵan oblysynda. О́ńirdegi ózenderde sý deńgeıi kóterilip, taǵy ondaǵan eldi mekendi sý basý qaýipi bar. Reseıdiń Qorǵan oblysynda 62 eldi meken, 4 myńnan asa úı men 600 saıajaı ýchaskesin sý basýy múmkin. Osy ýaqytqa deıin óńirde 21 úı men 100-ge jýyq jer ýchaskege sý jaıylyp, 7 tasjoldyń keı tustaryn shaıyp ketken. Qazir qaýipti aımaqtardan turǵyndardy evakýaııalaý júrgizilip jatyr. Qutqarýshylar osy ýaqytqa deıin 600-den asa adamdy kóshirdi. Olardyń 100-den astamy ýaqytsha ornalastyrý ortalyqtaryna jaıǵassa, 500-i týǵan-týystarynyń úıin panalaǵan. Qarǵyn sýdyń molaıýyna baılanysty bılik ókilderi halyqty shuǵyl túrde kóshýge shaqyryp jatyr.

Bılik ókilderiniń aıtýynsha, aldaǵy ýaqytta aımaqtaǵy ahýal kúrdelene túsedi. Sebebi Tobyl, Úı, Iset pen Mıass ózenderinde sý deńgeıi saǵat saıyn kóterilip jatyr. Rosgıdromet boljamy boıynsha Tobyl ózeniniń deńgeıi kóp uzamaı 11 metrden asady. Qazirdiń ózinde Zverınogolovsk aýdanynda ol 735 santımetrge jetken. Bir táýlik buryn ǵana dál osy eldi mekende Tobyl ózeniniń deńgeıi 660 santımetr shamasynda bolatyn. Al bizdiń eldiń shekarasynan 12 shaqyrym jerde ornalasqan Vvedenskoe beketinde sý 10 metr 75 santımetrdi kórsetip tur.

Vladımır Iakýshev, RF Prezıdentiniń Ýral federaldy okgrýgindegi ókiletti ókili:
-Tobyl ózenindegi sý buryn-sońdy bolmaǵan deńgeıge kóteriledi degen qaýip bar. Osyǵan baılanysty tıisti daıyndyq jumystary jyldam ári tıimdi júzege asyrylýy tıis. Eń aldymen qarǵyn sý boıynsha halyqty habardap etýi kerek. Turǵyndar muny eleýsiz qaldyrmaýy tıis. Qazirgi ýaqytta aımaqta bóget salý jumystary qyzý júrip jatyr. Sonymen qatar, qosymsha kúshter tartylýda. Búgin apat aýdandaryna Tótenshe jaǵdaı mınıstrliginiń aeromobıldi toby attandy. 100-den asa maman aımaqtaǵy tasqynnyń aldyn alýǵa kómektesedi. Tasqynǵa tosqaýyl qoıý úshin óńirdegi gıdrotehnıkalyq nysandar qorǵanys úıindilerimen bekitilip jatyr. Budan bólek, ınertti materıaldar, qapshyqtar daıyndalýda. Alapat tasqynnan Qorǵan qalasy kóp uzamaı aýyz sýsyz qalýy múmkin. Sebebi shahardy tirshilik nárimen qamtamasyz etetin nysandarǵa sý basý qaýpi tóngen. Osyǵan baılanysty bılik ókilderi halyqqa eskertý jasap, tez arada turmysqa qajetti sýdyń bir aılyq qoryn jınap alýǵa shaqyryp jatyr.

Vladımır Ovsıannıkov, «Vodnyı soıýz» kompanııasynyń bas dırektory:
-Tasqyn sýǵa qatysty jańa aqpar boıynsha halyqty taza sýmen qamtamasyz etetin nysandarǵa qaýip tónip tur. Osyǵan baılanysty Qorǵan turǵyndary sharýashylyq-aýyzsý maqsatynda qoldanylatyn sýdyń bir aılyq qoryn jınap alýy kerek. Qazirgi ýaqytta qala sýmen qalypty jaǵdaıda qamtamasyz etilýde. Iaǵnı halyqtyń sapaly sý qoryn jınap alýyna áli múmkindik bar. Biraq ýaqyt óte shekteýli. Úreıi qashqan jurt qazir jappaı qaladaǵy dúkenderge aǵylyp, sý satyp alyp jatyr. Uzynsonar kezek qalyptasqan. Sonyń saldarynan aýyzsý baǵasy kúrt qymbattap ketken.