Өнеркәсіптік қауіпсіздікті күшейту стратегиясы аясында кеніштің медициналық пункті базасында «АМТЖ» бағдарламалық-аппараттық кешенін тәжірибелік сынақтан өткізу басталды.
Жоба ауысым алдындағы медициналық тексеруді толық автоматтандыруға және жұмысқа рұқсат беру кезіндегі адам факторын барынша азайтуға бағытталған, деп хабарлайды qandastar.kz порталы.
Интеллектуалды терминал қызметкерлерге ауысым алдында жедел тексеруден өтуге мүмкіндік береді. Жүйе автоматты түрде қан қысымын, тамыр соғысын және дене температурасын өлшеп, алкогольге тест жүргізеді. Сонымен қатар жұмыскердің шағымдары мен психофизиологиялық жағдайы да талданады.
Кешеннің маңызды функцияларының бірі – көз қарашығының реакциясын бағалау. Бұл әдіс шаршау, күйзеліс және тыйым салынған заттарды қолдану белгілерін анықтауға көмектеседі. Нәтижесінде денсаулық жағдайы қауіп төндіруі мүмкін қызметкерлердің жұмысқа жіберілу қаупі төмендейді.
Жүйе деректерді жинақтау және өңдеу мүмкіндігімен де ерекшеленеді. Барлық тексеру нәтижелері бірыңғай цифрлық базаға енгізіліп, персоналдың денсаулық көрсеткіштерін талдауға пайдаланылады. Бұл созылмалы ауытқуларды ерте анықтауға, көрсеткіштердің өзгеру динамикасын бақылауға және ықтимал қауіптер туралы дер кезінде хабарлауға мүмкіндік береді.
Аталған жүйе тек бақылау құралы ғана емес, сонымен қатар профилактикалық қызмет те атқарады. Ол қызметкерлердің денсаулығына уақытылы көңіл бөліп, аурулардың алдын алуға ықпал етеді.
«АМТЖ» жүйесін енгізу адам факторына байланысты төтенше жағдайлар санын азайтып, медициналық бақылау тиімділігін арттыруға бағытталған.
Тәжірибелік-өндірістік сынақ 2026 жылдың мамыр айының соңына дейін жалғасады.
