Қостанай облысында криптовалютамен заңсыз айналысып, 1,9 млрд теңге табыс тапқан 28 жастағы тұрғынға сот үкімі шықты, деп хабарлайды qandastar.kz порталы.
Облыстық прокуратураның мәліметінше, ол 2020-2024 жылдар аралығында ешқандай рұқсатсыз Binance платформасының P2P сервисі арқылы цифрлық активтерді сатып алу-сату қызметін ұйымдастырған. Қаржылық операцияларды жүргізу үшін өзінің ғана емес, туыстары мен басқа адамдардың банк шоттарын пайдаланған.
Сот үкімімен ер адам 2 жылға бас бостандығынан айырылды. Сонымен қатар оның мүлкі тәркіленіп, 7 жыл бойы цифрлық активтер айналымы мен майнингке қатысты қызметпен айналысу құқығынан айырылды.
Сондай-ақ сот мемлекет пайдасына заңсыз табылған 1,9 млрд теңгеден астам қаржыны өндіріп, 13,4 млн теңге, екі жеңіл автокөлік және 7,9 мың АҚШ долларын тәркілеу туралы шешім шығарды.
