Қазақстанда балмұздақ өндірісі рекордтық көрсеткішке жетіп, экспорт көлемі айтарлықтай артты. 2026 жылдың алғашқы жартыжылдығында елде 35,1 мың тонна балмұздақ өндіріліп, бұл өткен жылдың сәйкес кезеңімен салыстырғанда 47,4%-ға көп. Бұл туралы Qandastar.kz ақпарат агенттігі хабарлайды.
Ұлттық статистика бюросының мәліметінше, осы кезеңде ішкі нарық көлемі де 41,2%-ға өсіп, 31,9 мың тоннаға жеткен.
Елдегі балмұздақ өндірісінің негізгі бөлігін «Шин-Лайн» компаниясы қамтамасыз етеді. Компания ішкі нарықтың шамамен жартысын қамтып, Қазақстаннан экспортталатын балмұздақтың 95%-ға жуығын өндіреді. Сондай-ақ кәсіпорын Forbes Kazakhstan журналының 2025 жылғы ең ірі 75 жекеменшік компаниясының қатарына енген.
2026 жылдың қаңтар–мамыр айларында Қазақстан 8 343 тонна балмұздақ экспорттап, көрсеткішті бір жылда 38,5%-ға ұлғайтты. Ал импорт көлемі 5 145 тоннаны құрап, өткен жылмен салыстырғанда 7,1%-ға ғана өскен.
Қазақстандық балмұздақтың басты экспорттық бағыты – Ресей. Бұл елге 5 748 тонна өнім жөнелтілген. Сондай-ақ Қырғызстанға – 2 019 тонна, Өзбекстанға – 498 тонна, Тәжікстанға – 53 тонна, Моңғолияға – 17 тонна және Әзірбайжанға – 8 тонна экспортталған.
Ауыл шаруашылығы министрлігі Қытай нарығына шығу жұмыстары жалғасып жатқанын мәлімдеді. Ведомствоның хабарлауынша, экспорт көлемін ұлғайту үшін қажетті логистикалық және реттеуші мәселелер кезең-кезеңімен шешіліп жатыр.
Импорттың басым бөлігі Ресей мен Қырғызстаннан келеді. Атап айтқанда, Ресейден 2 250 тонна, Қырғызстаннан 2 073 тонна балмұздақ жеткізілген. Бұл екі ел Қазақстан импортының 84%-дан астамын қамтамасыз етеді.
Айта кетейік, бұған дейін сарапшылар Қазақстандағы балмұздақ өндірісі соңғы он жылдағы ең жоғары деңгейге жеткенін хабарлаған болатын. Мамандар мұны балалар санының көбеюімен және халықтың балмұздақты жиі тұтынуымен байланыстырған. Сонымен қатар биылғы қаңтар–сәуір айларында балмұздақ бағасы өткен жылдың сәйкес кезеңімен салыстырғанда 19,5%-ға қымбаттаған.
