2026 жылдың алғашқы алты айында Қазақстан экономикасында инвестиция көлемі артып, цифрландыру мен бизнесті қолдау шаралары оң нәтиже көрсетті. Бұл туралы Үкіметтің баспасөз қызметіне сілтеме жасап, Qandastar.kz хабарлайды.
Үкіметтің мәліметінше, есепті кезеңде негізгі капиталға салынған инвестициялар көлемі 9,5 трлн теңгеден асты. Ал жеке инвестициялар өткен жылдың сәйкес кезеңімен салыстырғанда 21,4%-ға көбейген.
Экономикалық өсімге бірнеше маңызды фактор ықпал еткен. Атап айтқанда, кәсіпкерлерге түсетін әкімшілік жүктеме азайтылып, мемлекеттік сатып алу рәсімдерінің мерзімі үш есеге қысқартылды. Сонымен қатар, түрлі салада цифрлық технологияларды енгізу қарқыны күшейтілді.
Сондай-ақ елде жаңа Салық және Бюджет кодекстерін кезең-кезеңімен іске асыру жалғасып жатыр. Үкіметтің түсіндіруінше, бұл құжаттар экономиканың нақты секторын қолдауға, инвестициялық ахуалды жақсартуға және мемлекеттік қаржының тиімді жұмсалуын бақылауды күшейтуге бағытталған.
Айта кетейік, бұған дейін Ұлттық банк төрағасы Тимур Сүлейменов Ұлттық қорға түсетін түсімдердің көлеміне қатысты мәлімет берген болатын.
