QYZYLORDA-JEZQAZǴAN JOLY JYL SAIYN BATPAQQA AINALADY

Kún jylyna Qyzylorda-Jezqazǵan joly mı batpaqqa aınalady. Jyldaǵy jaǵdaı osy. Jaqynda ǵana batyp qalǵan 75 kólikti arnaıy tehnıka súırep shyǵardy. zyndyǵy 420 shaqyrymǵa sozylǵan joldyń Qyzylorda oblysy aýmaǵyndaǵy bóligin jóndeý 2 jyl buryn bastalǵan.

Al Ulytaýǵa tıesili aýmaqta áli qozǵalys joq.   «Qyzylorda-Jezqazǵan» kúre joly elimizdiń ońtústigi men soltústigin jalǵaıtyn tóte jol. Sondyqtan, teriskeıge baqsha ónimderin tasymaldaǵan kólik kerýeni osy trassamen júredi. Osydan 50 jyl buryn salynǵan jol búginge deıin kúrdeli jóndeý kórmegen. Ulytaý oblysyna qarasty 200 shaqyrymnyń teń jarymynda asfalt jamylǵysy joq. Kóktem men kúzde jolaýshylardy ábigerge salatyn tus  — osy.  Asqar Saqaev, oblys turǵyny: — Jezqazǵanǵa qaraı jol joq esebinde ǵoı. Jol joq qoı. 10 saǵat júrip kelemiz ǵoı. Ári qaraı 3 saǵatta jetip baramyz. 13 saǵat keted ta obshym jolǵa.

Bir júrgen jan azabyn umyta almaıtyn jolmen Qasen Baısheev aptasyna eki ret júredi. Soltústikke mal azyǵyn tasymaldaıtyn azamat talaı ret  jolda qalǵan. Osy joly da 3 kún júrip, zorǵa jetipti.  Qasen Baısheev, oblys turǵyny: — Zorǵa keldik shynymenen. Jolda batyp jatyr qansha kólik.  Jol bosap ketken. Osy joldy rettese dep otyr endi.  Aqyly bolsa da áıteýir tegis jolmen kelgenge ne jetsin. Erterek áreket jasap, bıyl qımyldasa durys bolar ed dep otyrmyz.  Joldy jóndeý eki jyl buryn bastaldy.  Ulytaýǵa qarasty 200 shaqyrymdy jańǵyrtýǵa bólingen 90 mlrd teńge jetpeı qaldy.   Byltyr úkimet «Azııa damý bankimen» birlesip, qarjy kólemin 145 mlrd teńgege kóterdi.

Satyp alý baıqaýy qazan aıynda ótken. Degenmen áli kúnge merdiger  anyqtalǵan joq.  Suńǵat Raqymjanov, «QazAvtoJol» UK» AQ oblystyq fılıalynyń dırektory: — Qazir Azıatskıı banktiń erejelerine saı jumystar júrgizilip jatyr. endi qazir merdigerler anyqtalǵan soń, jerdiń obezdnoı jol jasap, qalashyqtar jasap, karerlerdiń  qujattaryn daıyndaıdy. Osy jyldyń ekinshi jarty jyldyǵynda bastaımyz ba dep otyrmyz.   Jezqazǵanǵa syrttan tasymaldanatyn  taýardyń deni osy jolmen keledi. Joldyń nasharlyǵy árıne tasymal qunyn da arttyrady. Mamandardyń aıtýynsha, bul jolmen táýligine 1 myńnan astam kólik qatynaıdy.  Olardyń irkilissiz qozǵalysyn qamtamasyz etý úshin  jer qurǵap ketkenshe  «Qazavtojoldyń» arnaıy brıgadasy kezekshilik etedi.