Иранның қарулы күштері сенбі күні Ормуз бұғазы аумағында бақылауды қайта күшейткенін мәлімдеді. Осылайша, АҚШ-пен келіссөздер барысында қабылданған теңіз жолын ашу туралы шешімнің күші жойылды. Бұл туралы Qandastar.kz агенттігі BBC деректеріне сілтеме жасап хабарлады.
Мемлекеттік телеарна арқылы таратылған ақпаратта Иран тарапы Вашингтонды келісімді бұзды деп айыптап, Иран порттарына бағытталған кемелерге қатысты теңіз блокадасы жалғасып жатқанын жеткізді. Әскерилердің айтуынша, АҚШ кеме қатынасының еркіндігін толық қалпына келтірмейінше, бұғаз қатаң бақылауда болады.
Ислам революциясы сақшылары корпусының әскери-теңіз күштері Парсы және Оман шығанақтарында тұрған кемелерге қозғалысты тоқтатуды ескертті. Олардың мәлімдеуінше, Ормуз бұғазына жақындау қарсы тараппен байланыс ретінде бағаланып, талапты бұзған кемелер нысанаға алынуы мүмкін.
Сондай-ақ КСИР Дональд Трамптың бұл мәселеге қатысты айтқан пікірлерін жоққа шығарды. Ал Трамп өз кезегінде Иран бұғазды қайта жабуға ұмтылып отырғанын растағанымен, АҚШ қысымға көнбейтінін мәлімдеді. Ол келіссөздер жүріп жатқанын айтқанымен, нақты нәтижелер туралы ақпарат бермеді.
АҚШ Орталық қолбасшылығының дерегіне сәйкес, 13 сәуірден бері жүргізіліп жатқан блокада салдарынан ондаған кеме кері қайтуға мәжбүр болған. Ал Ұлыбританияның теңіз қауіпсіздігін бақылайтын қызметі бұғаз маңында бірнеше кеме атқыланғанын хабарлады. Кейбір кемелерге белгісіз снарядтар тигенімен, экипаж мүшелері зардап шекпеген.
Кейін Үндістан Сыртқы істер министрлігі аталған оқиғаларға қатысы бар екі кеме үнді туымен жүргенін мәлімдеп, Иранды олардың қауіпсіз өтуіне мүмкіндік беруге шақырды.
