Саяси сарапшы Данияр Әшімбаев Каспий Құбыр Консорциумына (КТК) жасалған украиналық шабуылды Қазақстанға бағытталған жүйелі әрекеттердің жалғасы деп санайды. Бұл туралы ол әлеуметтік желідегі талдауында айтты, деп хабарлайды QANDASTAR.
Ашимбаевтың айтуынша, Украина Қазақстанның бейтарап ұстанымына қарамастан, елімізге қатысты дұшпандық сипаттағы қадамдар жасап келеді. Ол мұны:
• ақпараттық провокациялар,
• алаяқтық пен қылмыстық схемалардың өсуі,
• есірткі трафигінің белсенділігі,
• КТК инфрақұрылымына жасалған диверсиялар арқылы дәлелдейді.
Сарапшы СІМ мәлімдемесін «өте қатаң сигнал» деп атап, Астана Киевтен мұндай шабуылдарды болдырмауға бағытталған нақты шараларды талап етіп отырғанын жеткізді.
Әшімбаев ақпараттық кеңістікте Украина әрекеттерін ақтауға тырысатын медиатоптар бар екенін, олардың бір бөлігі батыстық ақпараттық желіге жұмыс істейтінін атап өтті. Оның пікірінше, бұл топтар Қазақстанға қарсы саяси-идеологиялық қысым қалыптастыруға ұмтылады.
Сарапшы посткеңестік кезеңде Қазақстан мен Украинаның даму жолдары түбегейлі ажыралғанын айтады: Қазақстан тұрақтылық пен көпвекторлы саясатты таңдаса, Украина ішкі саяси дағдарыстар мен сыртқы тәуелділікке ұрынған. Сондықтан Астана прагматикалық позицияны ұстанған сайын қысымға көбірек тап болатынын алға тартты.
Әшімбаев Қазақстанның СІМ өте анық позиция білдіргенін, енді Астананың Киевтен ресми жауап күтіп отырғанын атап өтті. Оның пікірінше, Қазақстан ұлттық мүдделерін қорғауға арналған бірнеше сценарийді алдын ала дайындап қойған болуы мүмкін.
