Қазақстанда есірткі қылмысына қарсы күрес күшейіп жатыр.
Ішкі істер министрлігінің мәліметінше, биылғы жылдың алғашқы төрт айында есірткіге қатысты құқықбұзушылықтар үшін 76 шетел азаматы ұсталған, деп хабарлайды qandastar.kz порталы.
Олардың ішінде 23 адам – есірткі сатумен айналысқан, 3 адам – аса ірі көлемде сақтаған, 29 адам – контрабанда бойынша ұсталған.
Сонымен қатар, шетелдіктердің қатысуымен есірткі өсіру, жарнамалау және насихаттау деректері де анықталған.
Құқық қорғаушылар халықаралық әріптестермен бірге жұмыс істеп, іздеуде жүрген бір шетел азаматын қолға түсірді. Ол Қарағандыда синтетикалық есірткі өндірісін қашықтан ұйымдастырған.
Ірі қалаларда да бірнеше дерек тіркелді:
Астанада 32 жастағы шетелдік жалдамалы пәтерде ұсталып, одан 1,5 кг есірткі тәркіленді
Алматыда 44 жастағы ер адамнан 1,2 кг “A-PVP” табылды
Ақтауда 21 жастағы күдікті 30 грамм “мефедронмен” қолға түсті
Осы операциялардың нәтижесінде есірткі тарату арналарына соққы берілді.
ІІМ мәліметінше, есірткі қылмысы бүгінде трансұлттық сипатқа ие. Сондықтан мұндай заңсыз әрекеттер шетелдік серіктестермен бірлесіп тоқтатылып жатыр.
